October 26, 2021

Rwandanews24

Publishing Factual, verified and accurate stories

Ifatwa rya Rusesabagina rirasobanutse kandi rikurikije amategeko, urebye yaranizanye ubwe- Perezida Kagame asubiza CNN

YASUWE 62 

Iki ni kimwe mu bibazo Perezida Paul Kagame yasubije ubwo yari mu kiganiro n’umunyamakuru Richard Quest wa CNN amubaza ku ruhare rw’u Rwanda mu ifatwa rya Paul Rusesabagina, niba azahabwa ubutabera. Yagize ati: “Ifatwa rya Rusesabagina rirasobanutse kandi rikurikije amategeko, urebye yaranizanye ubwe.” Ku bijyanye n’imitegekere y’ I Burayi na demokarasi, bakaba badatinda ku butegetsi nkawe, yagize ati: “Kuba Abategetsi b’I Burayi batinda ku butegetsi cyangwa ntibabutindeho ntibindeba.” ;  “Demokarasi ntigenwa n’Abanyaburayi, sinagendera mu bitanoze by’I Burayi”

Umunyamakuru Richard Quest muri iki kiganiro dukesha urubuga rwa CNN cyo kuri uyu wa gatatu taliki ya 17 Gashyantare 2021, yabajije Perezida Kagame uko Rusesabagina yageze i Kigali.

Perezida Kagame yasubije agira ati “Niba yaravuganaga n’abo yari yibeshyeho, yakurikiye abo kugira ngo akomeze urugendo rwo gukora ibibi yari amaze igihe akora mu bihe byatambutse, ntabwo mbona..(Umunyamakuru wa CNN ahita abaza Perezida) ati “yari agiye he?”

Kagame ati “Yari arimo ajya i Burundi. Ntiyigeze ajya i Dubai nk’uko babivuga, Dubai yarahanyuze nk’uko Chicago yari inzira anyuramo kuko yavaga muri Amerika.”

Umunyamakuru Richard Quest ahita yongera akabaza Perezida Kagame ati “Yigeze amenya (Rusesabagina) ko aje i Kigali?”

Perezida Kagame aramusubiza ati “Ntabwo bindeba ibyo yatekerezaga, niba yaratekerezaga kujya i Burundi agahura n’abantu yakoranaga na bo cyangwa yayoboraga mu guhungabanya igihugu cyacu, ni iki cyoroshye jye nari gukora cyangwa undi muntu?”

Umunyamakuru aramubaza, hari uruhare rwa Leta y’u Rwanda mu kumuzana i Kigali? Perezida Kagame ati “Oya! Oya! Kumuzana cyangwa kumuyobora i Kigali, cyangwa ‘kumushimuta’ birumvikana ko bidakurikije amategeko, ni ibintu rwose bitandukanye cyane, rwose.

Noneho, niba umuntu yakoranaga n’undi mu Burundi mu mugambi umwe wo guhungabanya igihugu cyacu, wa muntu ni urugero agafata icyemezo cyo kuza i Kigali (kureba wa muntu yari yizeye) kandi wa muntu yari yizeye akaba akorana na Leta, ni gute Leta ihinduka umunyacyaha kuri icyo gikorwa?”

Umunyamakuru ahita abaza Perezida Kagame, ati ‘Amahanga atekereza ko Perezida Kagame ashaka ko igihe azaba yahamwe n’ibyaha (Rusesabagina), azatera cashet ku cyemezo cy’urukiko, imfunguzo akazijugunya kure, ni ikihe cyizere watanga kuri ibyo bivugwa?’

Perezida Kagame yavuze ko ibibazo nk’ibyo byibazwa n’abantu, ariko bikaba bitandukanye n’ukuri.

Ati “Rusesabagina ni umuturage w’iki gihugu (u Rwanda) wakoze ibyaha bibi (arakekwaho), numvise ko afite ubwenegihugu bw’ahandi simbitindaho, ntagushidikanya yakoze ibikorwa bibi kandi ashinjwa ari kumwe n’abandi bantu, si we wenyine muri uru rubanza na cyo kigomba gusobanuka. Bityo kumukura mu bandi, agahabwa umwihariko udasanzwe ibyo ntibishoboka.  Ikirego kiri mu rukiko kuri abo bose baburanishwa kandi ni ingenzi ko habaho urubanza rutabogama.”

Perezida Paul Kagame mu kiganiro n’umunyamakuru Richard Quest wa CNN kuri uyu wa gatatu

Gutinda ku butegetsi na Demokarasi…

Umunyamakuru avuye ku bya Rusesabagina yabajije Perezida Paul Kagame ati ‘Nta Mutegetsi w’I Burayi wamaze igihe nk’icyo umaze ku butegetsi?’

Perezida Kagame yamusubije ati “Ibyo bindebaho iki? Abategetsi b’I Burayi ni ab’I Burayi [araseka..] Umunyamakuru mu mvugo yoroheje imeze nko kuvuga umuvugo, ahita avuga ati “ariko muri Demokarasi habaho amatora…”

Perezida Kagame ahita asubiza ati “Keretse iyo umbwira ko buri wese agomba kwisanisha ku byo Abanyaburayi batubwira gukora. Ntabwo ndi umwe muri abo. Isi y’I Burayi ni isi ukwayo, bafite ibikorwa byiza bakora, bafite n’ ibikorwa bibi bakora …”

Umunyamakuru ahita amubwira ati “Nta muyobozi watowe muri Demokarasi kandi wemera Demokarasi wabaye ku Butegetsi igihe kimwe n’icyo ubumazeho.”

Perezida Kagame ati “Demokarasi ntabwo igenwa n’Abanyaburayi, Si byo! Niba ari byo, kuki habaho kwivuguruza tubona I Burayi? Aho tubona mu Burayi mu bihugu bimwe batora Abayobozi babo nyuma bakaza kugaragaza ibibazo kuri ba Bayobozi batoye ubwabo, ubwo urambwira ko Demokarasi ubwayo ifite ibitanoze haba I Burayi cyangwa ahandi aho ariho hose, ariko sinshobora kuba mu bitanoze by’I Burayi.”