Nyanza: Tembera umudugudu wamaze kwishyura Mutuelle ya 2021-2022

Nyuma yuko hari abaturage batarabasha kumva akamaro ko kwishyura amafaranga y’Ubwisungane mu kwivuza, mu karere ka Nyanza twageze mu mudugudu wamaze kwishyura ku kigero cya 100% ubwisungane bw’umwaka wa 2021-2022. Ubuyobozi bw’akagari buvuga ko Ibanga ryakoreshejwe ari uko abaturage babashije kumva ko ubuzima aribwo bwa mbere.

Uyu ni umudugudu wa Kamabuye uherereye mu kagari ka Katarara, Umurenge wa Ntyazo ho mu karere ka Nyanza mu ntara y’Amajyepfo.

Uyu mudugudu wabashije kwesa umuhigo ku itariki ya 01 Gashyantare 2021, urasaba RSSB ko yakwihutisha gukemura ibibazo biri muri system yabo, ku misanzu y’umwaka wa 2021-2022.

Bamwe mu baturage baganiriye na rwandanews24 bo muri uyu mudugudu bose bahuriza ku kintu cyo kuba ufite Mutuelle de sante atagakwiriye kurembera mu rugo, kandi ko ubuzima aribwo bwa mbere.

Umwe yagize ati “Twebwe kwesa umuhigo twabitewe nuko ubuyobozi bwatwegereye bukadusobanurira akamaro ka Mutuelle de sante, kandi twese tumaze kumenya akamaro kayo.”

Undi yagize ati “Uyifite ntarembera mu rugo, kandi nugiye kwivuza yishyura amafaranga make ugereranije nayo yari kwishyura atayifite.”

Uwitonze Joseph, Umunyamabanga nshingwabikorwa w’akagari ka Katarara yabwiye rwandanews24 ko bakoresheje ibanga ryo gukorana n’abaturage, bakabegera maze abaturage nabo babasha kumva ko ubuzima aribwo bwa mbere.

Uwitonze Joseph ati “Ibanga ryakoreshejwe ni ukwigisha abaturage bakumva ko ubuzima aribwo bwa mbere, kandi basobanuriwe ko badakwiriye kurindira ko ubuyobozi bwabikankaho ngo bishyure, twabashije kubigeraho muri uwo mudugudu mu gihe abandi baba bashakishwa ngo bishyure ubwisungane ku ngufu.”

Uwitonze Joseph asaba abaturage kwirinda ko ubuyobozi bwabirukaho ngo bishyure Ubwisungane mu kwivuza ku ngufu, kuko gukora ari kare.

Akomeza asaba abaturage gukoresha neza umusaruro babona, kuko abenshi bawubona mu kwezi kwa Mbere bisaba gukemura ni ikibazo cya Mutuel de Sante mbere wirinda ko wategereza umusaruro w’ukwezi kwa kane kuko hari ubwo uba muke.

Aka kagari ka Katarara gafite imidugudu 10, uyu mudugudu wabashije kwesa umuhigo w’umwaka tutarageramo utuwe n’abaturage 765.

Ku itariki 10 Gashyantare 2021, RSSB yatangaje ko ubwitabire mu kwishyura ubwisungane mu kwivuza 2020-2021bugeze kuri 84%, Uturere 5 twa nyuma 30. Kicukiro, 29. Rutsiro, 28. Nyagatare, 27. Gasabo na 26. Nyarugenge.

Uturere dutanu twa mbere  mu kwishyura ubwisungane mu kwivuza yari 1. Gisagara, 2. Gakenke, 3. Nyaruguru, 4. Nyamagabe na 5. Ruhango.

Uwitonze Joseph, Umunyamabanga nshingwabikorwa w’akagari ka Katarara gaherereyemo uyu mudugudu wabashije kwesa Imihigo ya 2021-2022
NSHIMIYIMANA Eric

NSHIMIYIMANA Eric

- Journalist and News Reporter @www.rwandanews24.com - Agricultural specialist and Analyst

error: Content is protected !!
Skip to toolbar