October 24, 2021

Rwandanews24

Publishing Factual, verified and accurate stories

Rubavu: Sebeya imaze gutakazwamo akayabo, abo yasenyeye barasaba kwimurwa

YASUWE 30 

Abaturage baturiye umugezi wa Sebeya mu karere ka Rubavu, bavuga ko barambiwe no guhora basenyerwa n’ibiza biterwa n’umugezi wa Sebeya wuzura ugatwara inzu zabo no kwangiza imyaka mu mirima, ni mu gihe iki cyogogo cy’umugezi wa Sebeya kimaze gutwara akayabo kaza Miliyari ngo ureke gusenyera abaturage. Ubuyobozi buvuga ko kugeza ubu kumenya ibyangijwe neza n’ibi biza haba hakiri kare kuko byibasiye imirenge itatu.

Ni nyuma y’imvura yahereye mu ijoro ryo kuwa 09 Gashyantare 2021 irimo kugwa kugeza mu gitondo cyo kuri uyu wa 10 Gashyantare 2021, aho harimo kubarurwa amazu asaga 08 amaze gusenywa n’uyu mugezi ndetse imibare ikaba irakomeza kwiyongera.

Ni nyuma yaho, mu iri joro ryakeye imvura nyishi yaguye amazi akabasanga mu nzu zabo batangira gusohoka bahunga kugira ngo bakize ubuzima bwabo.

Umugezi wa Sebeya wuzuye urenge inkombe zawo amazi atangira gusandara mu nzu z’abaturage, ndetse no mu mirima yabo.

Imirenge uwa Nyundo, Kanama ndetse n’uwa Rugerero niyo yibasiwe n’ibyo biza, aho kugeza ubu hari kubarurwa inzu zigera 8 zasenywe nabyo n’ubwo imibare yazo ikomeje gukusanywa.

Bamwe mu bagizweho ingaruka n’ibyo biza bavuga ko barambiwe guhora basenyerwa nabyo, kuko bigira ingaruka ku iterambere ryabo, bakaba basanga igisubizo kirambye ari ukwimurwa kuri izo nkengero z’’uyu mugezi wa Sebeya.

Bamwe mu baturage, bahatuye basanga iyo mishinga bavuga isa na baringa kuko basanga hari ibikorwa bimwe na bimwe babona bashyiraho bitakemura icyo kibazo mu buryo burambye nko gushyira imifuka idashobora kugabanya umuvuduko w’amazi menshi amanuka mu misozi ihanamiye umugezi wa Sebeya ituruka mu mashyamba ya Gishwati.

Umwe muri abo baturage yagize ati “Njyewe uwamvana hariya sinzongere kubona Sebey ukundi, bimaze kundambira ndetse n’imbaraga zanjye zimaze kuhashirira, dore ko niyo bamfasha bakampa sima ntabona ayo kwishyura umukozi kuko maze gukena.”

Undi yagize ati “Nta kintu na kimwe nsigaranye mu nzu, ntanubwo tuzi aho turabasha kurara uyu munsi, turasaba ko baza bakatwimura kuko Ibiza bya Sebeya bihoraho kandi bagahora baza bakatubwira ngo bigeye gukemuka ariko ntacyo bigeze badufasha.”

Umuyobozi w’akarere ka Rubavu, Habyarimana Gilbert avuga ko kugeza ubu kumenya ibyangijwe neza n’ibi biza haba hakiri kare kuko byibasiye imirenge itatu uwa Nyundo, Kanama na Rugerero. Gusa ngo hari ibikorwa biri gukorwa mu rwego rwo gukomeza  kubungabunga icyogogo cy’umugezi wa Sebeya n’ubwo hari byishi bigikenewe.

Habyarimana Gilbert ati “Haracyari ibikorwa byinshi bigikenewe kugira ngo tumenye ko abaturage nta kindi kibazo barajya bagira, tukongera ibikorwa byo gutera amashyamba, imigano, amaterasi no kubaka Ama Damu agabanya amazi.”

Muri iki gitondo, abaturage bagizweho ingaruka n’ibi biza bazindukiye mu bikorwa byo gusayura bimwe mu bikoresho bitatwawe nayo mazi birimo amabati, ibisenge no gusohora amazi mu nzu zari zarengewe.

Ibigo by’amashuri bituriye uyu mugezi wa Sebeya, abanyeshuri ntabwo bize bavuga ko abarezi babasubije inyuma batinya ko byabagiraho ingaruka.

Umushinga Ubungabunga Icyogogo cy’umugezi wa Sebeya ushyirwa mu bikorwa na Guverinoma y’u Rwanda ibinyujije mu kigo gishinzwe Umutungo Kamere w’ Amazi mu Rwanda (RWB) gifatanyije n’Umuryango Mpuzamahanga wita ku Kubungabunga Ibidukikije (IUCN) n’Umuryango w’Abaholandi ugamije Iterambere (SNV) ndetse n’Uturere ku nkunga ya Leta y’ Abaholandi.

Uyu mushinga ukorera mu Turere tune twa Rutsiro, Ngororero, Nyabihu na Rubavu.

Amafoto agaragaza uko umugezi wa Sebeya wuzuye