October 24, 2021

Rwandanews24

Publishing Factual, verified and accurate stories

Mashami Vicent yavuze ko abona adafite amahirwe yo gukomeza gutoza Amavubi

YASUWE 23 

Mu kiganiro kigaruka ku rugendo Ikipe y’Igihugu Amavubi iherukamo mu mikino ya CHAN2020 yabereye muri Cameroon, Umutoza w’Ikipe y’Igihugu yabajijwe niba yiyumvamo ko azakomeza gutoza iyi kipe kuko atirukanwe, arabihakana avuga ko nta “mahirwe afite”.

Mashami Vincent wakoze amateka nk’Umunyarwanda akageza ikipe y’Igihugu y’abakina imbere muri 1/4 cya CHAN 2020, yabanje gutanga ishusho rusange ry’uko u Rwanda rwabashije kujya muri Cameroon n’imyiteguro ikipe yakoze icyo gihe.

Ku kibazo cyo kongererwa amasezerano yo gutoza Ikipe y’Igihugu dore ko yanarangiye. Umunyamakuru Kwizera yavuze ko afite amahirwe yo gukomeza kuko atarirukanwa, ndetse n’inama yatanga ku mukino utaha wa Mozambique.

Mashami ati “Urakoze kuyampa (amahirwe yo gukomeza gutoza Amavubi), ariko nta mahirwe mfite yo gukomeza aka kazi. Sijye ugatanga sinanjye ukiha. Yenda niko ubibona ariko jyewe si ko mbibona.”

Inama atanga ku mukino wa Mozambique, ngo ni uko abakinnyi bategurwa neza, bagatangira umwiherero kare, cyangwa inzego zibishinzwe zigasubukura imikino ya Shampiyona.

Ubushobozi bwa Mashami Vincent ntibuvugwaho rumwe cyane mu Itangazamakuru ry’imikino, bamwe babona ko ntako atagira abandi bakemeza ko imitoreze ye idashobora kugeza kure ikipe y’Igihugu kubera ko akunda kugarira.

Mu mikino ya CHAN 2020 iheruka muri Cameroon, u Rwanda rwatsinze ibitego 3 rwinjizwa 2 byose byabaye ku mukino wa Togo, nta kindi gitego rwabonye mu irushanwa.

Amavubi yageze muri 1/4 nyuma yo kunganya na Uganda 0-0, na Maroc 0-0 (Maroc ni yo yatwaye igikombe itsinze Mali), ndetse rutsinda Togo 3-2.

Perezida Paul Kagame aherutse kwakira abasore b’Amavubi n’Umutoza abashimira uko bitwaye, cyane ashima ikinyabupfura no gushyira hamwe bagaragaje.

Hari ababibonyemo ko bishobora kuba ari amahirwe ku mutoza Mashami yo kuba yakomeza gutoza u Rwanda kuko aho kugawa yashimiwe umusaruro muzima.

Mashami Vincent yavuze ko abona adafite amahirwe yo gukomeza gutoza Amavubi