Rutsiro: Bamaze umwaka urenga baratereranwe n’Ubuyobozi, nabwo bukabyitirira Polisi

Bamwe mu bagore bo mu murenge wa Murunda, akagari ka Mburamazi bavuga ko batereranwe n’ubuyobozi, ni nyuma yuko agasoko bakoreraramo ubucuruzi buciriritse kagonzwe, uwabigizemo uruhare ubuyobozi bukamureka akagenda atabishyuye ngo buzabishyuriza, ntibugire icyo bubikoraho. Ubuyobozi bw’umurenge buvuga ko ikibazo cy’aba baturage kitakiri ku rwego rw’Umurenge ahubwo ko gifitwe na Polisi kuko ariyo yaje gupima.

Bamwe muri aba bagore bacururiza mu isoko ry’ibiribwa rya Mburamazi, barasaba ko nimba kwishyurizwa ibyangirijwe nuwagonze iri soko byaranze, ryakongera rigasanwa rigasubizwa uko ryahoze, kuko ririmo kwangirika bikabije bamwe bakabura aho gukorera.

Aba bagore bavuga ko mu kwezi k’Ukuboza muri 2019 ari bwo imodoka yaguye hejuru y’iri soko bacururizamo ibiribwa bitandukanye riherereye mu Mburamazi, kuva icyo gihe, bafite ibibazo bitandukanye ubuyobozi burabizi ariko ntacyo bwabafashije.

Uwitwa Uwimanintije Theresie yagize ati “Nyine imodoka yarazamutse ihetse imbaho, igeze hejuru y’iri soko iramanuka igwaho. Kuva yagwamo, imvura isigaye igwa tukanyagirwa kuko igisenge cyarasenyutse, ndetse kuri ubu bamwe basigaye bakorera hanze y’isoko twabuze uwadufasha.”

Akomeza avuga ko ikibazo cyabo kizwi n’inzego zose kuva ku mudugudu kugeza ku karere, ndetse ko na Polisi ariyo yaje gupima ngo bigezwe muri assurance ariko batungurwa nuko umwaka wirenze ntacyo bafashijwe.

Uwimana Speciose ati “Ubu ibintu byacu birangirika pe kubera imvura, ndetse hari n’ibyahombeyemo icyo gihe, twarategereje ko twishyurwa amaso ahera mu kirere kubera ko ubuyobozi bwitana ba mwana, wajya ku murenge bakatubwira ko ikibazo gifitwe n’akarere.”

Izi mbogamizi bagaragaza, nizo zituma basaba ko iri soko ryasanwa mu gihe cya vuba bakongera kurikoreramo rimeze neza nka mbere.

Icyizihiza Alda, umunyamabanga nshingwabikorwa w’umurenge wa Murunda, avuga ko nta makuru ahagije afite kuri iki kibazo cy’aba bagore, kuko ari mushya muri uyu murenge, ariko ahamya ko amakuru afite ari uko Procedure zose zakozwe na Polisi yo mu muhanda, ndetse ko iki kibazo kitakiri ku rwego rw’Umurenge nkuko yabitangarije rwandanews24 mu butumwa bwo kuri WhatsApp.

Imodoka yagonze iri soko yari yambaye purake RAC 804M, uwari ayitwaye  ni Habamenshi Augustin, aho yangirije ibintu bifite agaciro karenga Miliyoni Imwe n’igice.

Iri soko ricururizwamo cyane cyane imboga n’imbuto n’ibindi biribwa bimwe na bimwe, rimaze amezi umwaka urenga ryangiritse, rikaba rikorerwamo n’abacuruzi basaga 30.

Uko isoko ryagonzwe rigasigara rimeze kuburyo n’umureko wajyanaga amazi mu kigega wangiritse, bikaba bigoye kubungabunga isuku yaryo nta mazi

Mu byangiritse harimo ibikoresho by’ubwubatsi byahacururizwaga bifite agaciro karenga Ibihumbi magana atanu (500,000Frw)

Bamwe mu bacururiza mu ruhande rwagonzwe, iyo imvura iguye ibicuruzwa byabo biranyagirwa, ndetse n’imiryango y’udutara babibikamo yatangiye kubora
NSHIMIYIMANA Eric

NSHIMIYIMANA Eric

- Journalist and News Reporter @www.rwandanews24.com - Agricultural specialist and Analyst

error: Content is protected !!
Skip to toolbar