Gasabo: Abacururiza mu isoko rya Kinyinya bavuga ko babangamiwe n’iryo mu Birembo

Ibi ni ibivugwa n’abacururiza mu isoko rya Kinyinya mu karere ka Gasabo ko babangaiwe n’isoko ryo mu Birembo naryo ryo mu murenge wa Kinyinya kuko aya masoko aremera umunsi umwe, bakaba bifuza ko iminsi yatandukanywa nk’uko babibwiye Rwandanews24.

Abacuruzi baganiriye na Rwandanews24 bavuga ko guhuza iminsi kw’aya masoko byakozwe n’ubuyobozi kuko ngo mbere isoko ryari rimwe mu Murenge, ariko bahawe irindi barishyira ku munsi umwe kuko yose arema ku wa mbere no ku wa Gatanu.

Shyaka Afrodice, uhagarariye nyir’ isoko rya Kinyinya akaba avuga ko hakwiriye kugira icyakorwa. Ati: “Iri soko ryubatswe kubera icyifuzo cy’abaturage, Umurenge ku bufatanye n’Akarere baravugana rirubakwa riza gutahwa muri Nyakanga 2020. Mbere isoko rutarimuka ngo rikorere aha mudusanze twarakoraga kandi tukunguka kuko abakiliya twarababonaga ari benshi, ariko ubu abacuruzi  ntibagicuruza kuko abakoreraga mu isoko rya mbere bigiyemo ibice bibiri bamwe baza hano muri Eden market abandi bajya gutangira urindi mu Birembo kandi nyamara iri rya hano ariryo ryemewe, ibi byatemye tubura abakiliya kuko urumva nawe umuntu ntiyasiga isoko iruhande rwe ngo arenge imisozi aze I Kinyinya”.

Nzabonimpa Eric, ni umuyobozi wa Koperative Gasharu Market Services ya Kinyinya. Uyu muyobozi avuga ko kuba abacuruzi babangamiwe n’imikorere y’isoko ntacyo babikoraho. Ati: “Ntacyo dushobora kuvugana nabo kuko Koperative ivugana n’Ubuyobozi bw’Umurenge, ntivugana n’abacuruzi, Ubuyobozi bw’Umurenge nibwo butubwira icyo tugenderaho ntabwo ari twebwe tubwira abacuruzi ibyo bagomba kugenderaho. Ntabwo Koperative ariyo ihamagarira abacuruzi abakiliya ngo baze babagurire.”

Aha ni mu isoko rya Birembo

Ku bijyanye n’uko amasoko aremera umunsi umwe, yavuze ko aramutse ahujwe byaba byiza kurushaho , ariko ngo Koperative ntifite ububasha bwo kwimura isoko nk’uko bamwe babivuga.

Abacuruzi batandukanye baganiriye na rwandanews24, bifuza ko bahabwa iminsi itandukanye kugirango babone uko bacuruza kuko n’ubwo bimuriwe muri iri soko bavanywe mu ryo mu Gatare, ngo nirito ntibarikwirwamo. Ikintu ngo gituma basaba ko aya masoko yahuzwa cyangwa akanyuranywa iminsi, ngo ni uko abacururiza mu Birembo babatwara abakiliya kandi nyamara irya Kinyinya ariryo ryemewe

Rwandanews24 yagerageje kuvugana n’Umunyamabanga Nshingwabikorwa w’Umurenge wa Kinyinya ntibyakunda ndetse n’ubutumwa bugufi twamwandikiye ntiyabusubije.

Iri niryo soko rya Kinyinya
Aba ni abacururiza hanze y’isoko rya Kinyinya kuko badakwirwamo bose                                                                                                                                                                                                                                                                                                  Bamporiki Jean Claude@rwandanews24.rw
error: Content is protected !!
Skip to toolbar