October 24, 2021

Rwandanews24

Publishing Factual, verified and accurate stories

Karongi: Babangamiwe n’isuku nke irangwa ku Ibagiro ry’Akarere

YASUWE 85 

Bamwe mu baturage bo mu karere ka Karongi, Umurenge wa Bwishyura baravuga ko babangamiwe n’isuku nke ndetse n’umunuko ukabije uturuka ku ibagiro ry’Akarere riherereye muri uyu murenge. Ubuyobozi buvuga ko ikibazo cy’isuku nke iharangwa bukizi ndetse burimo kugishakira igisubizo kirambye.

Kuwa 01 Mutarama 2021, ubwo umunyamakuru wa rwandanews24 yasuraga iri bagiro yasanze rishaje ndetse ritajyanye n’igihe, agerageje kuvugisha abanyamuryango ba Koperative iribagiramo bamutera utwatsi, bamubwira ko Umukozi ushinzwe ubworozi mu murenge wa Bwishyura ariwe twavugisha kuko ikibazo cy’ibagiro ariwe ukizi.

Bamwe mu baturage twahasanze baje kuhagurira akaboga bagaragaje ko isuku nke irangwa kuri iri bagiro ibabangamiye, kandi byitwa ko ari ibagiro ry’akarere.

Umuturage umwe utarifuje ko amazina yiwe atangazwa yagize ati “Mu byukuri inyama twaje kuzishakira aha ku ibagiro kubera ubwinshi bw’abazikeneye zigera ku isoko zashize, turasaba Leta ko yakubaka ibagiro rigezweho, kuko iri ntabwo rikwiriye kuba ibagiro ry’umujyi, ndetse n’abacuruzi bakarushaho kubungabunga isuku ya hano kuko ni nke cyane.”

Mukamugema Verediyana, utuye mu murenge wa Bwishyura, akagari ka Gasura yagize ati “Inyama twaje kuzihaha no turebe ko abana bacu babona uko banywa agasosi, ariko umwanda uri hano urakabije, buri gihe iyo naziguriye hano ku ibagiro ntabwo ku munsi naziguzeho mbasha kuzirya, ndateka nkagaburira abana, njyewe nzirya ku munsi ukurikiye kubera umunuko n’umwanda wa hano biba byazimpugije. Birasaba ko Leta yashyiraho abakozi bahembwa bo kwita ku isuku ya hano.”

Iradukunda Joseline, utuye mu kagari ka Kibuye,  yagize ati “N’ubwo twaje kugurira akaboga hano ariko tubangamirwa n’isuku nke iharangwa kubera hatagira abantu bahoraho bo kuyikurikirana umunsi ku munsi.”

Rwandanews24 twageraeje kuvugisha umuyobozi wa Koperative ikora imirimo yo kubaga inka muri iri bagiro, atubwira ko amakuru ku ibagiro twayabaza ubuyobozi bw’umurenge kuko we amaze iminsi arwaye.

Bizimana Emmanuel, umukozi ushinzwe ubworozi mu murenge wa Bwishyura avuga ko iki kibazo bakizi, ndetse ko barimo kugishakira umuti urambye.

Bizimana yagize ati “Ikibazo cy’isuku nke ku ibagiro ry’umurenge wa Bwishyura kirazwi, ndetse tumaze n’iminsi turimo kukiganiraho na Koperative irikoreramo, ndetse harimo n’abantu ku giti cyabo bacuruza inyama batangiye kuza kurikoreramo, rero twemeje ko tugggiye gushhaka umukozi uhoraho ukurikirana isuku y’ibagiro akajya yishyurwa ku kwezi.”

Uwo muntu azaba ari uwo gufasha by’agateganyo kuko turimo gushaka ikibanza cyazubakwamo ibagiro rigezweho rijyanye n’igihe, kuko ririya risanzwe ryubatswe kera cyane, rikaba rishaje ndetse ahantu ryubatse ni muri metero 50 uvuye ku kiyaga cya Kivu, ahatemewe kubakwa, niyo mpamvu ritavuguruwe, ahubwo koperative twayijyanyeyo ngo ibe iryifashisha tuyisaba gushyiraho amakaro ngo bareke kujya babagira kumakoma, ndetse turimo turabasaba kuba bashyizeho ama Crochet yo kumanikaho inyama, kugira barusheho kuba bahangana n’isuku nkeya.

Iri bagiro rimaze imyaka isaga 28 ryubatse mu murenge wa Bwishyura, akagari ka Gasura, aha ni mu mujyi wubatsemo intara y’Iburengerazuba, rikaba ryari ryubatse ku buryo rifite inzira zijyana amayezi n’indi myanda mu byobo binini, ariko kubera umwanda izo nzira zarasibye, ndetse igiteye inkeke ubuyobozi ni uburyo abaturage bohereza abana babo kuza kwikorera amayezi n’amaraso y’amatungo yabazwe, bakajya kubiha andi matungo boroye mu ngo zabo.

Kubera ko inzira zitwara umwanda muri iri bagggiro zitagikora, abaturage baba bazanye indobo zo gutwaramo amayezi ngo bajye kugaburira amatungo yabo
Nubwo Koperative yashyizeho amakaro makeya ngo inyama ntizijye hasi, ariko usanga ari inyama zegeranye n’amayezi utabasha kubitandukanya
Ibagiro rikikijwe n’igihuru ikabije, kuburyo utamenya ko hatunganyirizwa ibitunga rubanda nyamwinshi
Uwahageze ku bunani yasanze Amabwiriza yo kwirinda Covid-19 batayakozwa, dore ko bari begeranye bikabije, kubera ko nta mukorerabushake waharangwaga ngo abahwiture