Rulindo:Hasohowe urutonde rw’abarimu badakora ngo bisobanure hisangamo n’abo mu byiciro bitarakomorerwa kwiga kubera COVID19

Ubuyobozi bw’akarere ka Rulindo, buherutse gushyira ahagaragara ibaruwa isaba abarimu bo mu karere ka Rulindo, ikubiyemo ubutumwa busaba abanyamabanga nshingwabikorwa b’imirenge yose gukurikirana abarimu batigisha amasomo bagomba kwigisha buri munsi.

Hatitawe ku mpamvu runaka zatuma umwarimu ataboneka mu kazi utarabonetse mu kazi agomba kwisobanura imbere y’akanama gashinzwe imyitwarire kuri buri kigo cy’ishuri, akarere gashingiye kuri sitati yihariye y’abarimu kavugako aba barimu bagomba kwisobanura.

Ku ruhande rw’abarezi,  ntibavuga rumwe n’akarere aho bamwe muri bo bavuga ko ibi bitakagombye kuba biba mu gihe atari gahunda yashyizweho mu gihugu cyose, ikindi cyagaraye muri iki gikorwa ni abarimu bagaragara kuri uru rutonde batari bagatangiye akazi bivuze ko ibyakozwe bishingira ku maranga mutima.

Umwarimu witwa Mahoro Yvonne (amazina yahinduwe) yagize ati “Nkanjye nageze ku kigo, nyuma dusabwa gusubira mu rugo kuko nta mabaruwa atwinjiza mu kazi twari dufite, ariko naje gutungurwa no kwisanga kuri uru rutonde kandi icyo gihe ntari nakageze mu kazi nta n’ingengabihe mfite, sinibaza uko nari kujya mu ishuri ntahawe ingengabihe”. Uyu mwarimu arimo kubazwa amatariki atigishijeho yo ku wa 24-27/11/2020 kandi yaratangiye akazi ku wa 1/12/2020, avuga ko iki ari ikimenyetso simusiga cya raporo ishingiye ku bihimbano”.

Kalisa Leonidas umwarimu wigisha mu mashuri abanza mu kiciro kibanza yagize ati “Ni gute ngaragara ku rutonde rw’abarimu batigishije kandi abanyeshuri nigisha bataremererwa gusubira ku ishuri? Ibi mbona ari akarengane no kwandagaza umuntu kuko nta masomo kugeza magingo aya mfite kuko abana bakiri mu ngo”.

Ikindi kibazo cyagiye kigaragazwa n’abarimu ni uko usanga hari abagaragazwa kuri uru rutonde abandi bagakingirwa ikibaba bitewe n’ubucuti bafitanye n’abayobora ibigo by’amashuri nk’aho abarimu babwiye Hanga dukesha iyi nkuru  ko abo basangira inzoga ahenshi bagiye babakingira ikibaba kuko aribo batanga iyi raporo, bikaba byagiye biteza ukutavugarumwe n’ubuyobozi bw’ibigo by’amashuri.

Uru rutonde rukaba rugaragaraho abarimu bagera kuri 809 mu karere kose ka Rulindo. Ubuyobozi bw’akarere ntacyo buratangaza kuri iki kibazo.

error: Content is protected !!
Skip to toolbar