Umuturage yandikiye Perezida Kagame ku kibazo cy’abana b’inshuke n’ab’ikiciro cya 1 cy’amashuri abanza batiga

Umuturage uvuga ko hishwe amategeko ubwo ibigo bimwe byitwa ko bigendera ku nteganyanyigisho mpuzamahanga (International Schools), byemerewe gukomeza kwigisha abana b’inshuke, mu gihe abandi biga mu mashuri asanzwe batemerewe gutangira, iki kibazo yakigejeje kuri Perezida Paul Kagame.

Jean Paul Ndayisabye  yagize ati “Rwose ibaruwa ni jye wayanditse, ndikorera ntuye Kacyiru.”

Yavuze ko ibaruwa yayinyujije kuri email ya Perezida atanga kopi yayo ku zindi emails za Minisiteri yandikiye, gusa ngo ategereje igisubizo kuko yabandikiye mu bihe by’ibiruhuko.

Abajijwe niba afite ikizere cyo gusubizwa, ati “Ndagifite kuko ikibazo mfite ntikireba njye njyenyine, abana ntibagira aho bavugira, no mu rwandiko nagiye ngendera ku mategeko amwe igihugu gifite, abana barababaye.”

Avuga ko yahereye ku bana be aho bari mu rugo babonaga ab’abaturanyi be buriye imodoka bagiye kwiga bo bagasigara mu rugo, yumva bimuteye urujijo, nibwo na we yakurikiranye asanga hari amashuri amwe y’inshuke yemerewe gukomeza kwigisha, ariko akavuga ko bitatangajwe.

Ababyeyi ngo bakomeje babivugira mu matamatama, ariko ntibabyerure, Ndayisabye     akibaza impamvu Minisiteri itemeye kureka amashuri ngo yigishe noneho igenzura rigaragaze atubahiriza amabwiriza yo kwirinda Covid-19 afatirwe izindi ngamba nk’ “uko byagenze ku makipe akina umupira w’amaguru”.

Yagize ati “Byarambangamiye kubona ba bandi byitwa ko bafite ubushobozi bwo hejuru ari bo bemerewe kandi mu buryo butanditse ngo habe itangazo rusange bakubwire bati ririya shuri twaryemereye ko risubukura amasomo kuko rifite ibikoresho ibi n’ibi byo kwirinda ririya rindi ridafite, nandikiye REB na MINEDUC kuri Twitter ntibansubiza nsanga ari byiza kwandika mu buryo bunyuze mu mategeko.”

Abana be ngo bagiye mu cyumba bambara imyambaro y’ishuri bamubaza impamvu abandi baturanye bajya kwiga, ahita yandika kuri Twitter abaza ntiyasubizwa, ni bwo yanditse agaragaza ko hari amategeko y’igihugu aba yarenzweho.

Umwe mu Banyamategeko uharanira uburenganzira bw’abana, yavuze ku bitekerezo by’uyu muturage, avuga ko bifite ishingiro.

Yavuze ko izo mpaka zihari, ati “Bifite ishingiro, none se kuko bamwe biga abandi ntibige kandi bangana imbere y’amategeko?”

Hagenimana Innocent ushinzwe Itangazamakuru n’Itumanaho mu Kigo cy’Igihugu cy’Uburezi (REB), yabwiye Umuseke dukesha iyi nkuru ko nta busumbane bwabaye mu kuba hari ibigo “International School” birimo kwigisha abana b’inshuke.

Ati “Ntabwo bwari ubusumbane ahubwo ni uko hari harashyizweho uburyo bwo kwirinda kandi bumwe mu buryo bwo kwirinda harimo guhana intera hagati y’umunyeshuri n’undi, ukurikije umubare w’ibyo bigo mpuzamahanga avuga biba bifite umubare muto w’abanyeshuri bitandukanye n’ahandi, kandi natwe muri gahunda yo kugabanya ubucucike natwe turi kongera ibyumba by’abanyeshuri ngo uwo mubare ugabanuke, ntaho bihuriye n’ubusumbane.”

error: Content is protected !!
Skip to toolbar