Ifoto y’umunsi: Umwuzukuru wa Perezida Kagame yagaragaye ubwo yagezaga ku Banyarwanda uko Igihugu gihagaze

YASUWE 22,070 

Kuri uyu munsi wasangaga buri Munyarwanda wese aho ari muri gahunda ateganya avuga ko saa Saba yayihariye gukurikirana ijambo Perezida wa Repubulika y’u Rwanda, Paul Kagame yagejeje ku baturage agaruka ku ishusho yaranze umwaka wa 2020.

Ni ijambo ryakurikiranywe n’umubare munini w’abaturage ndetse rirangiye bahabwa umwanya wo kubaza ibibazo bitandukanye. Mu bakurikiranye iri jambo harimo n’umwuzukuru we akaba n’impfura ya Ange Kagame na Ndengeyingoma Bertrand.

Mu ifoto Ange Kagame yashyize kuri Twitter igaragaza iyi mfura ye y’umukobwa iryamye mu ntebe isa n’iri kureba amashusho yerekanaga Perezida Kagame ageza ijambo ku baturage.

Iyi foto Ange Kagame yayiherekesheje amagambo agaragaza ko bakurikiye iri jambo Perezida Kagame yagezaga ku baturage.

Iyo foto yazamuye amarangamutima ya benshi bamwe batangira kugaragaza ko uyu mwuzukuru ashobora kuba akumbuye sekuru bitewe n’uburyo yitegerezaga televiziyo.

Uwitwa Ian Mwambutsa yagize ati “Akumbuye sekuru.”

Uwitwa Medard we yagize ati “Tumuhaye #Ikaze. Imana ikomeze kumuha ubuzima buzira umuze. Ababyeyi mukomereze aho.”

Umwuzukuru wa Perezida Kagame yitegereza uko ageza ijambo ku baturage

Ngoboka Théogène na we yunzemo ati “Byiza cyane Imana ikomeze imukuze kuyobora babyiga kare rwose urabona ukuntu akurikiranye ijambo ashishikaye.”

Umunyamakuru Edmund Kagire uri mu bitabiriye ikiganiro Perezida Kagame yagiranye n’abanyamakuru yasabye uyu mwuzukuru kumubariza ikibazo cya kabiri, ni nyuma y’uko muri iki kiganiro yagaragarije Umukuru w’Igihugu ko afite ibibazo bibiri ariko akemererwa kubaza kimwe kugira ngo n’abandi babone umwanya.

Mu butumwa Kagire yashyize kuri Twitter yagaragaje ko uyu mwuzukuru ashobora kumubariza ikibazo cya kabiri cyane ko ari we wisanga cyane kuri Perezida Kagame.

Ati “Incwii…. iyi ni intangiriro nziza. Ashobora kumbariza ikibazo cya kabiri, cyane ko uburenganzira bwuzuye bwo kugera kuri sekuru.”

Mu bihe bitandukanye Perezida Kagame ntiyahwemye kugaragaza ibyishimo aterwa n’umwuzukuru we. Muri Nzeri Umukuru w’Igihugu yavuze ku kuba afite umwuzukuru ndetse ko ari “byiza cyane”.

Yagize ati “Nari menyereye kuba gusa se w’abana, iyo wabaye noneho na Sekuru w’abana, uba wazamutse mu ntera.”

Yakomeje avuga ko mu gihe azaba atakiri Perezida wa Repubulika, yiteguye gutangira indi mirimo yo kurebera abuzukuru.

Ati “Ni umukobwa muzima, arakura vuba, iyo amasaha y’ingendo ataragera hari ubwo niruka nkajya kumusura, iyo nagiyeyo ngenda nka Kagame.”

Abantu bakoresha imbuga nkoranyambaga bifashishije Twitter maze bagaragaza ibyishimo batewe no kubona umwuzukuru wa Perezida wa Repubulika, banashimira Ange Kagame na Bertrand Ndengeyingoma bamwibarutse.

Ange Kagame yibarutse muri Nyakanga uyu mwaka, ni nyuma y’uko yashyingiwe tariki ya 6 Nyakanga 2019 mu birori by’imbonekarimwe byari bibereye ijisho.

Mu mpera za Ukuboza 2018, nibwo yari yasabwe na Bertrand Ndengeyingoma mu birori bijyanye n’umuco Nyarwanda byabereye mu rugo rwa Perezida Kagame mu Karere ka Rwamagana mu Murenge wa Muhazi.

 

error: Content is protected !!
Skip to toolbar