Umukoro ku bikorera mu ntara y’Iburengerazuba ku guhangana na Forode

Abikorera bo mu ntara y’Iburengerazuba bihaye umukoro wo guhangana n’ikibazo cya Forode yamunze intara y’Iburengerazuba, yagaragaye cyane muri ibi bihe bya Covid-19.

Uyu mukoro bawihaye kuri uyu wa 10 Ugushyingo 2020, ubwo Ikigo cy’Imisoro n’Amahoro cyizihizaga ku nshuro ya 18, umunsi wo gushimira abasora mu ntara y’Iburengerazuba.

Bamwe mu bikorera baganiriye na Rwandanews24 badutangarije ko guhangana na Forode bikwiriye kuba ibya buri wese.

Urimubenshi Aimable, ukora umucuruzi mu karere ka Karongi yaize ati “Ibanga ku bikorera nta rindi usibye kubikora ubikunze, rero nanjye ndi umucuruzi ubikora abikunze, turashimira Ikigo cy’Igihugu cy’Imisoro n’Amahoro cyatekereje ku gushimira abasora, bigakorwa bahabwa ibihembo kuva ku rwego rw’Intara no ku rwego rw’Igihugu, bituma dukorana umwete no gusora icyo gihe dusora dushyizeho umuhate tukanabikangurira bagenzi bacu.”

Urimubenshi akomeza avuga ko Covid-19 iri mubyabakomye mu nkokora intego y’umusoro bari barihaye ntigerweho, ariko agaragaza ko nibabasha gukora cyane no gukangurira bagenzi babo gusora uyu mwaka bizagerwaho.

Urimubenshi ku kibazo cya Forode avuga ko nk’abikorera aribo bagomba kuba nyambere mu gutanga amakuru ku gihe ku nzego z’umutekano n’izibanze, kugira ngo uwari wese watuma umusoro utagera aho wagenewe yabiryozwa, kuko bamaze gusobanukirwa n’akamaro k’umusoro.

Uwankwera Judith yagize ati “Njyewe nabashije kwitinyuka ndakora mva mu kazi ka Leta mbasha kwikorera, ndetse nabikoze kubera ko nabonaga ari ibintu bikenewe mu karere ka Nyamasheke.”

Uwankwera avuga ko yishimiye kuba umwe mu babashije guhhembwa, ndetse akavuga ko umusoro ugira akamaro kenshi mu kuzamura ubukunggu bw’igihugu, ndetse n’ibikorwaremezo birimo amashuri, amavuriro n’ibindi akaba atewe ishema no kuba umwe mu babigiramo uruhare.

Uwankwera arashishikariza abadamu n’urubyiruko kwitinyuka bakihangira imirimo batarebye ku bushobozi bafite, kuko amafaranga ayariyo yose yakora, ndetse akomeza avugga ko kwikorera bifunura mu mutwe.

Hitayezu Dirgeant umuyobozi w’Urugaga rw’Abikorera (PSF) mu ntara y’Iburengerazuba avuga ko igikorwa cyo gushimira abasora ari igikorwa cyiza.

Hitayezu Dirgeant yagize ati “Iki gikorwa ni indashyikirwa, iyo ubona ukora ibikorwa bibyara inyungu, ugasora, ukazabishimirwa biutera imbaraga zo gukora cyane.

Hitayezu Dirgeant avuga ko ku bikorwa bya magendu nka PSF bagiye kurushaho guhangana nacyo, kubera imikoranire myiza bafitanye na Leta, ndetse avuga ko bazakora ibisoboka byose bagahangana n’ikibazo cyabanyereza imisoro ya Leta, kuko iyi misoro aribo ifitiye inyungu, kuko akenshi nubwo imisoro igenda ariko ibagarukira nkuko bashyiriweho ikigega nzahurabukungu kuri business zahungabanyijwe na Covid-19.

Muri uyu mwaka uyu munsi wari ufite insanganyamatsiko igira iti “Dushyigikire Ubucuruzi, Twubake Ubukungu Buhamye.”

Komiseri mukuru w’Ikio cy’Imisoro n’Amahoro bwana Bizimana Ruganintwari Pascal yavuze ko iyi nsanganyamatsiko igamije gushimangira ubufatanye buri hagati y’Abasora n’Ikigo cy’Imisoro n’Amahoro muri iki gihe cya Covid-19.

Bizimana Ruganintwari Pascal yagize ati “Iki ikorwa kigamije gushimira abasora no guhuza inzego zitandukanye mu gihugu cyose, hakabaho kungurana ibitekerezo, mu kuzahura ubukungu cyane muri ibi bihe duhanganye na Covid-19, bityo tukagira ubukungu buhamye.”

Mu ntara y’Iburengerazuba mu mwaka w’isoreshwa wa 2019-2020 hakusanijwe imisoro ihwanye na Miliyari 27,9 Frw ku ntego ikigo cyari cyarahawe ingana na Miliyari 30,2 Frw, bihhhwanye na 92.6%. ni mugihe iyi misoro nubwo itageze ku ntego bari barihaye imisoro yakusanijwe yiyongereyeho 3.7% ugereranije n’imisoro yari yarakusanijwe mu mwaka wa 2018-2019.

Mu ntara y’iburengerazuba hahembwe ikigo Faster Development Ltd yo mu karere ka Rusizi, Ngororero Mining Company Ltd, Moriah Hill Resort Ltd yo mu karere ka Karongi, Boulangerie et Alimentation de Gisenyi yo muri Rubavu, Samuel Mukeshimana wo muri Nyabihu, Ibigabiro Forest Motel yo muri Nyamasheke na K.C Ubumwe Company Ltd yo mu karere ka Rutsiro.

Ibi bibaye mu ie intara y’Iburengerazuba iza ku isonga mu gufatirwamo Forode nyinshi zituruka mu gihugu cy’abaturanyi cya RD Congo, ziganjemo Urumogi, amasashe, amavuta ahindura uruhu ndetse n’imodoka zifite ibyangombwa bihimbano.

Ibikorwa byo gushimira abasora biteganyijwe kuzasozwa ku munsi nyirizina wo gushimira abitwaye neza ku rwego rw’Igihugu tariki 20 Ugushyingo 2020 kuri Kigali Convention Center.

Urimubenshi Aimable avuga ko kuba RRA ishimira abasora, bibatera umuhate wo gusora babikunze (Photo: Ububiko Rwandanews24)

Munyentwari Alphonse, Guverineri w’Intara y’Iburengerazuba (Ibumoso) kumwe na Hitayezu Dirgeant umuyobozi wa PSF mu ntara y’Iburenggerazuba mu bitabiriye uyu muhango
Komiseri mukuru w’Ikio cy’Imisoro n’Amahoro bwana Bizimana Ruganintwari Pascal yavuze ko insanganyamatsiko yuyu munsi igamije gushimangira ubufatanye buri hagati y’Abasora n’Ikigo cy’Imisoro n’Amahoro
NSHIMIYIMANA Eric

NSHIMIYIMANA Eric

- Journalist and News Reporter @www.rwandanews24.com - Agricultural specialist and Analyst

error: Content is protected !!
Skip to toolbar