Rubavu: Abazunguzayi bariye karungu, umwe muribo yashatse kwiyahura

Abasanzwe bakora umwuga wo gucuruza imbuto bazimukana mu mujyi wa Gisenyi bazwi nk’abazunguzayi bariye karungu, ni nyuma yuko umwe muribo yashatse kwiyahura nyuma yuko bamwatse Inanasi yacuruzaga bakazishyira mu mashini ikazisya nawe yashatse kujya muri icyo kimashini. Ubuyobozi bw’umurenge wa Gisenyi buvuga ko igihe cyo kwigisha abazunguzayi cyarangiye ahubwo kuri ubu bageze mu gihe cyo guhana, uzafatirwa muri ubu bucuruzi butemewe kandi barashakiwe amasoko bajya gukoreramo bakinangira.

Ibi byabaye kuri uyu wa 26 Ukwakira 2020, ubwo bamwe muri aba bagore bafatwaga na Polisi ikabaka ibyo bacuruzaga, bigashyirwa mu modoka itwara imyanda ikabisya, ibintu babona nkaho Leta ikabije kudaha agaciro amafaranga n’imbaraga baba bashoye, bavuga ko aho kugira bishyirwe muri icyo kimodoka kibisye byajya bihabwa imbabare. Ubuyobozi bukavuga ko bwari busanzwe bubikora bukabiha abababaye ariko bwaje gusanga hari ubwo bashobora kubaha ibihumanyije bikaba byagira uwo bigiraho ingaruka.

Abahoze ari abazunguzayi kuva na kera mu mujyi wa Gisenyi, bakavanwa muri ubwo bucuruzi bakajyanwa gucuruza imbuto kwa Rujende baherutse gutangariza rwandanews24 ko barambiwe gusiragizwa, gufatwa bakarazwa muri Stade, bagasaba ubuyobozi kubashakira ahandi bakorera, haherereye mu gice cy’umugi kuko ariho bakenera imbuto. Ni mugihe Ubuyobozi bw’akarere bwadutangarije ko aho bakoreraga hatemerewe kuba isoko nuwo bakodeshaga ikibanza yagize uruhare mukubagumura.

Bamwe mubaganiriye na rwandanews24 kuri uyu wa gatandatu bahurije ku kintu kimwe, ko Leta yabafashiriza aho bari basanzwe bakorera, aho kubafata ngo ibajyane mu masoko ya Rugerero na Majengu bo bafata nkao ntabaguzi b’imbuto bazigera bahabona.

Umwe muribo yagize ati “Mu Rwanda hari abababaye benshi, mugihe babafashe barwanya ko batakomeza kuzunguza, bajya babifata mu ibanga rikomeye bakabibashyira, twebwe dusanga mu Rwanda tutaragera ku kigero cyo kumena ibiryo, abantu twese byaturenze kuo turababaye cyane.”

Yasize abana 5 mu nzu, yaje gushaka amafaranga ya kigoma y’umwana atwite, none ibyo yari yikoreye imashini irabisyeye mu modoka y’imyanda, uyu mu mama nawe yashakaga kwiterera muri iriya mashini ngo nawe imusyane nibyo yarimo adandaza ariko Imana iramurokoye.

Uwatswe Inanasi yagize ati “Nambutse umuhanda nikoreye inanasi, bankuye ibasi yuzuye ku mutwe, ndabatakambira mbasaba imbabazi aho kumbabarira bari bagiye no kunkubita, badukuye mu isoko ryo kwa Rujende twakoreragamo, nasize abana 5 mu rugo, inanasi nari nzitanzeho amafaranga ibihumbi 7, ubuse abo bana ndabashyira iki? Umupaka urafunzwe kandi twarakoreraga I Goma nibafungure umupaka ntibazongera kutubona muri uyu muhanda kuko turabona uru Rwanda rutazababwamo n’umukene.”

Undi yagize ati “Uriba bakujyane nunakoresha amaboko yawe bakujyane, ndetse ukeneye guhahira abana, turifuza ko Perezida wa Repubulika ariwe waturenganura, kuko abakene twese turi abe.”

Uwimana Vedaste, umunyamabanga nshingwabikorwa w’Umurenge wa Gisenyi yemereye Rwandanews24 iby’aya makuru, adutangariza ko bariya bagore bigishijwe kenshi mbere yuko bavanwa muri iryo soko bavuga ryo kwa Rujende, ndetse banubakiwe amasoko bagomba kujya gukoreramo ariko banze kuyajyamo, kuri ubu ikigezweho si ni uguhana.

Uwimana Vedaste yagize ati “Barigishijwe kenshi, ndetse n’urutonde rw’uko bagombaga kujya mu masoko bubakiwe, irya Rugerero na Majengu nibo barwiyandikiye, bahawe aho gukorera ariko ntibashaka kujyayo ahubwo basubira mu muhanda rero kuri ubungubu igikurikiyeho ni uguhana.”

Iyo umuntu yanze kumvira Ubuyobozi ku bintu baganiriyeho bakabyemeranya igikurikiraho ni ibihano, abazabasha kugaragaza ko bagiye mu masoko boherejwemo bikamunanira tuzamufasha.

Ishimwe Pacifique, Umuyobozi w’Akarere ka Rubavu wungirije ushinzwe imibereho myiza aherutse kubwira rwandanews24, ko iryo soko bavuga bakuwemo nabwo bahagiye ari amaburakindi, byari byarateje ikibazo abandi bacuruzi b’imboga n’imbuto bakorera mu isoko rinini, kuko abazunguzajyi bacuruzaga badasora nyamara bacuruza bimwe, bagacuruza byinshi kuko bacuruzaga ku biciro bitoya.

Yavuze ko babasabye ko bajya mu masoko baboherejemo, hanyuma ufite ikibazo cyihariye akajya ku murenge wa Gisenyi bakamufasha, ariko baranze kandi ibyo bakora ntibyemewe na gato n’ubucuruzi bw’akajagari badashobora kwihanganira muruyu mujyi.

Akarere ka Rubavu kubera imiterere yako, no kuba gahana imbizi n’umujyi wa Goma ho mu gihugu cy’abaturanyi cya RD Congo, ni kamwe mu turere kabarurwamo abagore benshi bakora ubucuruzi buciriritse, kugira bashake amaramuko, ndetse kuri ubu kubera ikibazo cy’umupaka ugahuza na Goma ufunze kubera Covid-19 n’abacururizaga muri Kongo barimo gukorera mu mujyi ngo bashake amaramuko, ikintu kizagora Ubuyobozi guhangana nacyo mugihe aba bagore badashaka kugana amasoko bubakiwe.

Inkuru zabanje: Rubavu: Abacuruzi b’imbuto birukanwe bitunguranye none bateje akajagari mu mujyi

Rubavu-Gisenyi: Abagore bacuruzaga imbuto bateje akajagari mu mujyi bagiye gufatirwa ibihano bikakaye

Rubavu: Abazunguzayi barambiwe gusiragizwa no gufungwa, Ubuyobozi bugashinja nyir’ikibanza kubagumura

Ubucuruzi bw’akajagari ni ikibazo gikomeye, kuko ingamba zo kwirinda ikwirakwira rya Covid-19 budahari, baba begeranye ntan’udupfukamunwa bambaye ndetse n’abatwambaye batwambara nabi

NSHIMIYIMANA Eric

NSHIMIYIMANA Eric

- Journalist and News Reporter @www.rwandanews24.com - Agricultural specialist and Analyst

error: Content is protected !!
Skip to toolbar