October 20, 2021

Rwandanews24

Publishing Factual, verified and accurate stories

Karongi: Abarobyi baratakambira akarere ko bakeneye umushahara uzwi

YASUWE 22 

Abakora umwuga wo kuroba Isambaza mu Kiyaga cya Kivu, barasaba ko akarere ka Karongi kabakorera ubuvugizi bakagira umushara uzwi kandi uhoraho, bakanahabwa amasezerano, bagatangirwa ubwishingizi, kuko bizabafasha kugana ibigo by’imari bagahabwa inguzanyo, bakabasha kwikura mubukene, mu gihe abayobozi ba sendika babarizwamo bavuga ko ayo bahabwa, agendanye n’umusaruro baba babonye, mugihe abafite amakipe bavuga ko aba barobyi aribo bishe amasezerano kuko mu gihe cyashize bakoraga bagahembwa umushara uzwi, bakaza kwica amasezerano bavuga ko batakora batihemba, mu gihe ubuyobozi bw’akarere ka Karongi buvuga ko iki kibazo busanzwe bukizi ndetse burimo no kugikurikirana ngo kibonerwe umurongo uhamye.

Umurobyi waganiriye na rwandanews24 utifuje ko amazina yiwe atangazwa yagaragaje imbogamizi bahura nazo, uburyo bakora hafi ukwezi bagahembwa amafaranga atarimo na tike yabageza iwabo nkiyo bafunze,

Yagize ati: “ Uyu murimo maze imyaka irenga ine ariwo nkora, ariko amafaranga duhembwa rwose aracyari make, kuko nkubu turimo gukora ariko hari ubwo ukwezi gushira bakaguhemba amafaranga atanavamo itike yakugeza iwanyu, ngo ubashe gusura umuryango wasize, amafaranga menshi duhembwa ni ibihumbi umunani (8.000frw), aka ni akazi dukora katagira ubwishingizi kuko twumva ko tubutangirwa ariko iyo hari ugize ibyago akagwa muri aya mazi ntacyo umuryango we ubona, kandi ikitubabaza ari uko twabwirwaga ko duhabwa amafaranga make kuko Soras hari ayo iba yakuyeho.”

Mu byo twasobanuriwe kuguhabwa amafaranga make tubwirwa ko nta musaruro uba wabonetse, kuko duhora tubwirwa ko ubutaha tuzongererwa ayo twahawe, kuko harimo n’abahabwa inote y’igihumbi (1.000frw) bakabura uko bataha iwabo kandi kuroba ikivu gifunze, tukaba dusaba Akarere ko kadukorera ubuvugizi, tugahabwa umushara uzwi kandi uhoraho kugira ngo natwe tubashe kwiteza imbere ndetse n’imiryango yabo.

Kwitonda Theoneste usanzwe aba muri komite ya koperative y’abarobyi, akaba n’umurobyi wabigize umwuga kuko afite amakipe aroba isambaza yatangarije rwandanews24 ko ikibazo aba barobyi bagaragaje nabo ubwabo basanzwe ariko bifuza ko byagenda, abarobyi bakagira umushahara uzwi kuko byabarinda kubiba umusaruro, kuko babasha kubahiriza ibikubiye mu masezerano ndetse abakora umwuga wo kuroba nabo bagatera imbere.

Twirinde covid19 iterwa na coronavirus

Ati: “Amafaranga make abakozi bavuga ko bahabwa twebwe siko tubibona, kuko mbere bari bafite umushahara bagenerwa barawanga, kuko bishe amasezerano twari dufitanye yavugaga ko batagomba kwiba umusaruro ngo bihembe, ndetse nayo mafaranga bavana mu musaruro bihembye bamwe muri bo agatuma bajya kunywa bagasinda, bakarara imusozi mugihe abandi bagiye mu kazi, ni bimwe mubituma bahembwa amafaranga make batagakwiriye guhembwa, kuko ibyinshi baba bamaze kubyihemba.”

Ubuyobozi bwari bwaradufashije mugukora ariya masezerano, kandi natwe twabonaga ko umusaruro urimo kuboneka tukabahemba neza, byaradufashaga cyane, bikaturinda kuba batwiba, ariko turacyakomeje kuba twaganira nabo kugira ngo nabatarabyumva babashe kubyumva, turasaba Leta ko yadufasha ikabasha no kujya ita muri yombi abo banga gutaha mugihe twafunze, kuko ntawe uhabwa amafaranga atamugeza iwabo ngo ubutaha azagaruke gukora ako kazi, akenshi usanga biganjemo babandi badaha agaciro umurimo, bata akazi bakajya kurara imusozi, mu businzi n’uburaya, cyangwa abiyitirira ko ari abarobyi kandi basanzwe ari mayibobo.

Umukozi ushinzwe iyubahirizwa ry’umurimo mu karere ka Karongi avuga ko iki kibazo basanzwe bakizi ndetse barimo no kiganiraho n’ubuyobozi bwa koperative y’abarobyi ya UCOOPEVEKA kugira kibashe kuba cyabona umurongo uhamye, inzego zombie abarobyi naba nyiri amakipe bakorane mu buryo bunogeye buri umwe, kugira ngo buri umwe itegeko ry’umurimo rimurengere.

Uyu muyobozi akaba avuga ko nyuma yuko icyorezo cya coronavirus cyugarije isi kizaba kigabanutse, azongera kuba yaganira n’impande zombie kugira ngo iki kibazo kibonerwe umurongo uhamye.

Eric Nshimiyimana@rwandanews24.com