October 26, 2021

Rwandanews24

Publishing Factual, verified and accurate stories

Nyabihu: Ubuyobozi bw’Akarere bwakodesheje isambu y’umuturage afitiye ibyangombwa atabizi

YASUWE 45 

Umuturage witwa Nzarora Jean D’amour utuye mu Karere ka Nyabihu, Umurenge wa Bigogwe, akagali ka Rega, umudugudu wa Kariyeri, mu ibaruwa yandikiye umuyobozi w’akarere ka Nyabihu kuwa 20 Ugushyingo 2019 amusaba kurenganurwa ku iyangirizwa ry’isambu ye rwandanews24 ifitiye copi, akarere kakaza kohereza Agoronome ngo ajye gukora igenagaciro ku byangijwe, ariko ubutaka bw’umuturage bakamubwira ko batagomba kubumwishyura kuko ngo kuva kuri sentimetero 70 ujya mu kuzimu ari ubutaka bwa Leta.

Nyuma yo kubona akarengane uyu muturage yakorewe Rwandanews24 yamwegereye maze ayibwira akarengane yakorewe n’akarere, kafashe ubutaka bwe kakabukodesha rwiyemezamirimo ucukuramo umucanga wa Kariyere, yakwandikira Mayor akamwoherereza uza kubikurikirana ntanyurwe nibyo bamusubije.

Nzarora Jean D’amour ati: “Ikibazo cyanjye nagiye kukigeza  ku muyobozi w’akarere haciyeho amezi atatu, mu butaka bwanjye mfitiye ibyangombwa hacukurwa umucanga ntazi uwaboherejemo nabaza bakambwira ko ari akarere kabakodesheje, rwiyemezamirimo urimo sinjye namukodesheje yakodeshejwe n’akarere mu butaka bwanjye nasigiwe n’ababyeyi.”

Ibi nibyo birayi by’umuturage byangijwe

Ikibazo gikomeye cyane nagize ni uko nandikiye umuyobozi w’akarere musaba kundenganura, aho kuza yohereza agoronome w’akarere  n’abagenagaciro kugikurikirana, bemeza ko tuzishyurwa inturusu zangirijwe, ubutaka bwo ngo ni ubwa Leta, ndangije nanjye nanga kwishyurwa ayo mafaranga abagenagaciro bari bambariye, nkaba ntegereje kuzajyana akarere na rwiyemezamirimo mu nkiko, kugira ngo mbashe kubona ubutabera nabuze, kuko ntabwo wumva ukuntu umuntu afite ibyangobwa by’ubutaka bwa Leta.

Nk’uko aba bayobozi b’akarere babitubwiye, batubwiye ko tuzishyurwa inturusu zangirijwe naho ubutaka ngo kuva kuri sentimetero 70 ujya mukuzimu aba ari ubwa Leta, kandi kuba harimo umucanga hagomba kuba aha Leta, rero akarere kasabye rwiyemezamirimo kwishyura ibiti byangirijwe ubutaka akareka kubwishyura kuko ari ubwa Leta.

Ibiti babikoreye igenagaciro ku gaciro k’amafaranga y’u Rwanda Magana inani ku giti kimwe (800frw), mu gihe habaruwe ibiti bisaga 76 byangirijwe n’uko gucukura umucanga wa Kariyeri, bakaba aribyo babaruye byaguye hasi ibindi bisigaye mu manegeka bakaba bavuga ko batabyishyura, ibirayi byangirijwe byo babigeneye agaciro k’amafaranga ibihumbi icumi (10.000frw), tubonye tutanyuzwe duhitamo kwanga kwmera tukaba twiteguye kugana urukiko ngo ruturenganure.

Rwandanews24 yaganiriye na Gahutu Tebuka, umuyobozi w’umurenge wa Bigogwe iki kibazo cyabereyemo, adutangariza ko iki kibazo akizi ariko akaba yari aziko cyakemutse kuko ubuyobozi bw’akarere bwaje kugikurikirana.

Yagize ati: “Icyo kibazo turakizi ariko twari tuzi ko cyakemutse, kuko twasabaga uwo muturage kumvikana na rwiyemezamirimo, akarere kakohereza umuyobozi wo kugikurikirana, tukaba twumvaga ko cyakemutse. Mu makuru dufite ni uko abo baturage n’ubwo bafite ibyangombwa by’ubutaka, ariko igice kinini bagerageje kurengera ubutaka bwa Leta, ikaba ari nabwo yakodesheje rwiyemezamirimo, atari ubw’abaturage, gusa kuko imyaka iba ihinzeho iba ari iy’abaturage baba bagomba kwishyurwa niyo mpamvu hakozwe igenagaciro.”

Mukandayisenga Antoinette umuyobozi w’akarere ka Nyabihu twagerageje kumuhamagara ku murongo wa Telephone, ariko ntibyadukundiye kuko telefoni ye ngendanwa atabashije kuyitaba.

Umucanga rwiyemezamirimo acukura muri iyi kariyeri awujyana kuri CIMERWA iherereye mu karere ka Rusizi, ahazwi nko mu Bugarama ikawutunganyamo sima (Ciment).

Kuva hejuru ujya mu kuzimu ubutaka ngo ni ubwa leta

Itegeko n° 58/2018 ryo ku wa 13/08/2018 rigenga ubucukuzi bw’amabuye y’agaciro na kariyeri ryasohotse mu Igazeti ya Repubulika y’u Rwanda nº33 yo ku wa 13/08/2018, rikaba ryaraje risimbura Itegeko no 13/2014 ryo ku wa 20/05/2014 rigenga ubucukuzi bw’amabuye y’agaciro na kariyeri. Iri tegeko rigenga ibikorwa by’ubucukuzi bw’amabuye y’agaciro na kariyeri mu Rwanda rireba ibikorwa byerekeye ubushakashatsi, ubucukuzi, ubucuruzi no gutunganya amabuye y’agaciro na kariyeri.

Amahame rusange kuri iri tegeko

Iyi niyo baruwa umuturage yandikiye akarere

Nk’uko ingingo ya 4 y’iri tegeko ibiteganya, mu rwego rw’ubucukuzi bw’amabuye  y’agaciro   na   kariyeri  hakurikizwa amahame rusange akurikira: uburenganzira bwose bwo gutunga no kugenzura ibituruka ku mabuye y’agaciro na kariyeri, biri ku butaka, munsi cyangwa hejuru y’ubutaka bw’u Rwanda bihariwe gusa Leta ariko bitabangamiye uburenganzira umuntu afite ku butaka n’ibyo abutungiyeho – gushakisha, gucukura, gutunganya, gucuruza amabuye y’agaciro bikorwa gusa n’uwabiherewe uruhushya nk’uko biteganywa n’iri tegeko – gukora ibikorwa by’ubucukuzi bwa kariyeri bikorwa gusa n’uwabiherewe uruhushya nk’uko biteganywa n’iri tegeko.

Umuyobozi ubifitiye ububasha ashobora kugena kariyeri zimwe na zimwe Leta ifiteho ububasha bwihariye zikoreshwa mu mishinga y’inyungu rusange, uwahawe uruhushya hashingiwe kuri iri tegeko, mbere y’uko atangira ibikorwa bye, ashyikiriza umuyobozi ubifitiye ububasha raporo ku nyigo y’isuzuma ngaruka ku bidukikije n’imibereho myiza y’abaturage yemejwe n’urwego rwa Leta rubifite mu nshingano zarwo.

Uburenganzira kuri nyir’ubutaka

Mu mitunganyirize y’ubucukuzi bw’amabuye y’agaciro na kariyeri, nyiri ubutaka cyangwa undi wese ubufiteho uburenganzira mu buryo bwemewe n’amategeko, abufiteho uburenganzira hashingiwe ku itegeko rigenga ubutaka mu Rwanda. Icyakora, iyo ubutaka bugaragayemo amabuye y’agaciro cyangwa kariyeri, mbere y’uko uwahawe uruhushya atangira ibikorwa bye byo gucukura; nyiri ubutaka cyangwa undi wese ubufiteho uburenganzira mu buryo bwemewe n’amategeko agenerwa ingurane ikwiye nk’uko biteganywa n’itegeko ryerekeye kwimura abantu ku mpamvu y’inyungu rusange.

Nshimiyimana Eric@rwandanews24.com