October 19, 2021

Rwandanews24

Publishing Factual, verified and accurate stories

Burundi: Umuyobozi w’Ishyaka CNL ritavuga rumwe n’ubutegetsi yapfuye arashwe

YASUWE 16 

Urupfu rwa Methusela Nahishakiye wari umuyobozi wa CNL muri komini ya Kabezi muri zone Migera rwamenyekanye kuwa Mbere taliki 16 Werurwe 2020 yishwe arashwe n’imbonerakure iwe mu rugo i Kabezi mu ntara ya Bujumbura.

Nyuma y’uko Agathon Rwasa yemerewe kuzahatanira umwanya w’umukuru w’igihugu mu matora yo muri Gicuransi 2020, bisa nk’aho bitakiriwe neza n’ishyaka riri ku butegetse CNDD-FDD.

Bivugwa ko hari umugambi wo kwivugana bamwe mu batavuga rumwe na Leta wacuriwe mu nama zitandukanye, iheruka ikaba yari yabereye mu kabari kazwi nka Gare du Nord iyobowe n’imbonerakure ikuriye izindi mu ntara ya Bujumbura.

Ishyaka rya CNL ribanye rite n’irya CNDD-FDD

Aya mashyaka yombi yagiye agaragaza ubwumvikane buke mu bya politike aho bigaragara ko n’ubwo Perezida Pierre Nkurunziza yatangaje ko ataziyamamaza muri aya matora yegereje.

Ubwoba buracyari bwose kuko abamurwanya bibumbiye muri CNL ishyaka rya Rwasa Agathon kandi bakaba bakomeje kwerekana ko biteguye guhangana n’umukandida wa CNDD-FDD, Gen. Evaritse Ndayishimiye.

Hari amakuru avuga ko uruhande rwa CNDD-FDD narwo nk’ishyaka riri ku butegetsi rukomeje gukaza umurego wo gukora inama zigamije gukora intonde z’abahagarariye ishyaka rya CNL ngo bicwe batageze mu gihe cyo kwiyamaza ari na byo byagaragaye ku muyobozi akaba n’umurwanashyaka wa CNL Methusela Nahishakiye. Ibi CNDD-FDD ntacyo irabivugaho.

Uretse kandi uyu wishwe, undi witwa Ndayisaba Joker na we aherutse guhondagurwa hafi yo kwicwa ku mabwiriza bivugwa ko yatanzwe na Ndayikengurukiye Jeremie uyoboye imbonerakure za CNDD-FDD.

Leta y’u Burundi ntiyemera uruhare rwayo mu iraswa rya Methusela Nahishakiye, ahubwo 10 mu barwanashyaka ba CNL bamaze gutabwa muri yombi bashinjwa kuba ari bo bihishe inyuma y’urupfu rw’umuyobozi wabo.

Imbonerakure za CNDD-FDD zakunze kuvugwaho imyitwarire mibi n’abanyagihugu ndetse n’amahanga aho zishinjwa kugirira nabi abatavuga rumwe na Leta no kwica inzirakarengane.