October 19, 2021

Rwandanews24

Publishing Factual, verified and accurate stories

MINICOM yamaganye ba rusahurira mu nduru ishyiraho ibiciro bishya ntarengwa

YASUWE 122 

Nyuma y’uko hagaragaye indwara y’icyorezo ya covid19 mu Rwanda ku wa gatandatu taliki 14 Werurwe 2020 hagashyirwaho ingamba zo kugikumira ikwirakwizwa ryacyo no kukirinda, Guverinoma yashyizeho uburyo bwo kwirinda burimo gucyura abana ku mashuri bagataha, kwirinda kujya ahateraniye abantu benshi by’umwihariko hafunganye nko mu nsengero, mu bukwe n’ahandi ndetse no gukaraba intoki n’amazi meza n’isabune kandi kenshi.

Bamwe mu bacuruzi bahise bishyiriraho ibiciro ku biribwa bitwaje izi mpinduka zo kwirinda coronavirus, ariko Minisiteri y’Ubucuruzi n’Inganda yanze kureberera aba bacuruzi ba rusahurira mu nduru bishyiriyeho ibiciro bagamije guhenda abaturage.

Minisiteri y’Ubucuruzi n’Inganda (MINICOM), yasohoye itangazo ku wa mbere taliki 16 Werurwe 2020, riburira abacuruzi batangiye kuzamura ibiciro by’ibicuruzwa, cyane cyane ibyo kurya, bitwaje icyorezo cya Coronavirus ko abazabifatirwamo bazahanwa hakurikijwe itegeko.

Minisiteri ivuga ibi ishingiye ku itegeko nomero 36/2012 ryo ku wa 21 Nzeri 2012 rigenga ihiganwa mu bucuruzi no kurengera abaguzi.

Yaboneyeho kugaragaza ibiciro bya bimwe mu biribwa, ababicuruza batagomba kurenza haba mu masoko no mu mabutike.

Umuceri wa Tanzaniya (25Kg), igiciro cyo kurangura ntikigomba kurenga Frw 25 500, naho ku badandaza igiciro ntikirenge Frw 1 200 ku kilo. Umuceri w’umunyarwanda (Kigori 25Kg), ntawemerewe kurenza Frw 18,500 ku barangura na Frw 800 ku kilo ku badandaza.

Umuceri w’umunyarwanda (muremure 25Kg), ni Frw 19,700 kurangura na Frw 850 ku kilo ku badandaza, naho umuceri wa Pakistan (25Kg) urangurwa ku Frw 21,000 ukadandazwa ku giciro kitarenze Frw 900 ku kilo, mu gihe uwa Tayilande utagomba kurenza Frw 26.500 kurangura na Frw 1,200 ku kilo ku badandaza.

Ibiciro by’imboga byari byazamutse bikabije

Ibishyimbo by’umutuku ku barangura ntibigomba kurenza Frw 600 ku kilo, naho kudandaza ntibirenze Frw 650 ku kilo, mu gihe ibya Colta kurangura ni Frw 850 ku kilo na Frw 1,000 ku kilo ku badandaza.

Kawunga (MINIMEX na Iraboneye 25Kg), ntizigomba kurenza Frw 17,000 kurangura na Frw 800 ku kilo ku badandaza, naho izindi kawunga zikarangurwa ku Frw 15,000 zikadandazwa kuri Frw 620 ku kilo.

Ibirayi bya Kinigi ku barangura ntibigomba kurenza Frw 380 ku kilo, naho abadandaza ntibagomba kurenza Frw 420 ku kilo, mu gihe ibirayi by’umweru birangurwa Frw 280 bigacuruzwa kuri Frw 300 ku kilo.

Amavuta yo kurya (5L) arangurwa ku atarenga Frw 9,000 akadandazwa ku Frw 2,200 kuri litiro, naho igitoki kikarangurwa atarenze Frw 280 ku kilo kigacuruzwa kuri Frw 300 ku kilo.

Ibiciro by’umuceri byari byamaze gutumbagira

Ifu y’imyumbati ku badandaza, ikilo kimwe kigomba kugura hagati ya Frw 400 na 800, naho ifu ya Kinazi (40Kg) kurangura ntigomba kurenza Frw 23,000, ikagurishwa atarenga Frw 900 ku kilo ku badandaza.

Isukari iva hanze (50Kg) ntigomba kurenza Frw 39,500 ku barangura na Frw 900 ku badandaza, mu gihe iya Kabuye (50Kg) itagomba kurenza Frw 42,000 ku barangura na Frw 1,000 ku kilo ku badandaza.

Minisiteri y’Ubucuruzi n’Inganda  irasaba abaguzi gutanga amakuru mu gihe babona izamuka rikabije ry’ibiciro aho ari ho hose kugira ngo hafatwe ingamba byihuse, bahamagara ku murongo utishyurwa 3739, bakaba banawuherwaho n’andi makuru bifuza.