October 19, 2021

Rwandanews24

Publishing Factual, verified and accurate stories

Musanze: Impamvu “zikomeye” zatumye abakekwaho gutwikira abana mu nzu bafungwa by’agateganyo

YASUWE 24 

Urukiko rw’Ibanze rwa Muhoza rukorera mu Karere ka Musanze, rwanzuye ko abantu batandatu bakurikiranweho icyaha cyo gutwika abana b’umuturanyi wabo bafungwa by’agateganyo iminsi 30 ku bw’impamvu ziswe ko zikomeye.

Abakurikiranwe uko ari batandatu, bashinjwa ibyaha birimo icy’ivangura, ubwicanyi, gutwikira umuntu ku bushake ndetse no gukubita no gukomeretsa ku bushake.

Barimo uwitwa Munyakazi Evariste, Mugiraneza Ildephonse, Hitimana Jean de Dieu usanzwe ari n’Umukuru w’umudugudu wa Marantima kiriya cyaha cyabereyemo, Munyamahoro Innocent, Nsengiyumva Theoneste na Uwamariya Visensiya.

Ibyaha bashinjwa gukora byakozwe Ku mugoroba w’itariki 22 Gashyantare 2020, ubwo abana babiri b’akobwa ba Manifashe Jerome na Sifa Celestine batwikirwaga mu nzu umwe akahasiga ubuzima undi akaba yaramaze gucibwa akaguru mu Bitaro bya Kanombe aho arwariye.

Ubwo abaregwa bagaragaraga imbere y’umucamanza ku wa 10 Werurwe, bose bahakanye ibyaha bakurikiranweho bavuga ko “ntaho bahuriye na byo.” Bavuze ko ubwo bariya bana batwikwaga nta n’umwe muri bo wari mu rugo, ko ahubwo bari bagiye mu mirimo yabo ya buri munsi.

Icyo gihe ubushinjacyaha bwasabiye abaregwa gufungwa iminsi 30 y’agateganyo, mu rwego rwo gukusanya ibindi bimenyetso bizashingirwaho muri ruriya rubanza.

Abaregwa basabye ko ibyo bari bemereye ubugenzacyaha ku ruhare rwabo mu itwikwa rya bariya bana biteshwa agaciro, ngo kuko igihe bari mu bugenzacyaha batari bameze neza.

Ubwo yasomaga umwanzuro wa ruriya rubanza ku wa 13 Werurwe, umucamanza yasubiyemo ibyagiye bivugwa n’impande zose, yaba abatangabuhamya, ubushinjacyaha n’abakekwaho biriya byaha ; maze yanzura ko abaregwa bafungwa by’agateganyo iminsi 30.

Umucamanza yavuze ko impamvu zikomeye zatumye hanzurwa ifungwa ry’agateganyo ry’uwitwa Munyakazi Evariste n’abana be batatu bafunganye, ari uko ubwo bari mu bugenzacyaha bagiye bashinjanya ku ruhare rwabo muri buriya bugizi bwa nabi.

Hari kandi amakimbirane bagiye bagirana n’umuryango watwikiwe abana mbere yo kuwuhekura. Ibi ngo babikoraga babwira uriya muryango amagambo y’ivangura, kuwukorera urugomo ndetse no kuwufungira inzira y’imodoka.

Urukiko kandi rwanzuye ko Hitimana Jean de Dieu uzwi nka Bondo wayoboraga Umudugudu wa Marantima kiriya cyaha cyabereyemo adafungurwa by’agateganyo, bitewe n’uko atigeze yita ku bibazo umuryango wa Manifashe wagiye unyuramo kugeza igihe watwikiwe abana.

Hari kandi na Nsengiyumva Theoneste wayoboraga kamwe mu tugari two mu Murenge wa Kabatwa muri Nyabihu, na we wakunze kurangwa n’imvugo zishingiye ku ivangura yavugaga kuri uriya muryango.

Urukiko rwavuze ko gufunga iminsi 30 bariya batandatu ari ukwirinda ko basibanganya ibimenyetso, kwirinda ko hari undi bagirira nabi cyangwa we akabagirira nabi.