October 19, 2021

Rwandanews24

Publishing Factual, verified and accurate stories

Uganda: Perezida Museveni yahagaritse Umuryango SWI bivugwa ko ukorana na RNC

YASUWE 22 

Perezida wa Uganda Yoweli Kaguta Museveni yategetse ko Umuryango Utegamiye kuri Leta witwa Selfworth Initiative uhagarika ibikorwa byawo muri Uganda kuko ngo watunzwe urutoki ko waba ukorana RNC, Umutwe urwanya ubutegetsi bw’u Rwanda washinzwe na Kayumba Nyamawasa.

Chimpreports  dukesha iyi nkuru ivuga ko iri ari itegeko ryatanzwe na Perezida Museveni mu nama yamuhuje n’abandi bategetsi mu Ngoro y’Umukuru w’Igihugu i Kampala.

Iki kinyamakuru gitangaza ko ibi byakozwe mu rwego rwo kunoza umubano wa Uganda n’u Rwanda umaze imyaka isaga ibiri urimo agatotsi.

Museveni yasabye abayobora uyu muryango wa SWI bavuga ko impirimbanyi z’uburenganzira bwa muntu;  Prossy Bonabaana na Sulah Nuwamanya guhagarika ibikorwa byawo.

SWI uhakana gukorana na RNC

Mu itangazo uyu muryango uherutse gushyira hanze wagize uti: ” Ntabwo turi abayoboke b’ishyaka rya politiki iryo ari ryo ryose mu Rwanda no hanze y’u Rwanda, ahubwo turi impirimbanyi z’uburenganzira bwa muntu zirengera abatagira kivugira n’abanyantege nke muri Uganda kandi aba barimo n’impunzi, abashaka ubuhungiro, Abagande n’Abanyarwanda bibasirwa n’ubushotoranyi bw’u Rwanda.”

Aha wasubizaga ibyari byatangajwe n’Umunyamabanga wa Leta muri Minisiteri y’Ububanyi n’Amahanga, Amb. Olivier Nduhungirehe, yavuze ko bidatangaje kuba Selfworth Initiative yakwamagana irekurwa ry’Abanyarwanda icyenda bari bafungiwe muri Uganda. Ati: ” Kuba barimo kubyamagana birerekana ko bashaka ko ibibazo bikomeza. Turabizi ni Sulah Nuwamanya na Prossy Boonabana bari inyuma y’iri tsinda ryashinzwe na RNC,”

N’ubwo bahakana gukorana na RNC, bivugwa ko uyu Muyobozi wa Selfworth Initiative, Boonabana ari umwe mu bagize Komite Nyobozi ya RNC muri Uganda barimo na Dr Gedeon Rugari nk’umwungirije n’uwitwa Sulah Nuwamanya nk’Umunyamabaganga Mukuru. Ni amakuru ataremezwa n’uruhande rudafite aho rubogamiye.

Museveni afashe iki cyemezo mu rwego rwo kubahiriza ibintu u Rwanda rwasabye, harimo gukora iperereza kuri uyu muryango wa Self-Worth Initiative, aho rwasabye kugenzura ibikorwa by’abantu bawugize barimo Prossy Bonabaana, Sula Nuwamanya, Dr. Rukundo Rugari, Emeritthe Gahongayire na Emmanuel Mutarambirwa, rushimangira ko bari mu buyobozi bwa RNC muri Uganda.