October 26, 2021

Rwandanews24

Publishing Factual, verified and accurate stories

Karongi: Umusore afunzwe akekwaho gusambaya umwana w’imyaka 10

YASUWE 34 

Manirarora Matayo, mwene Mukabuteke Sitefaniya, utuye mu mudugudu wa Josi, akagali ka Gitarama, Umurenge wa Bwishyura, ari mu maboko ya RIB sitasiyo ya Bwishyura,  akurikiranweho icyaha cyo gusambanya Uwineza Marcelline w’imyaka 10, mwene Habineza Marcel na Izabayo Dorcas, batuye mu mudugudu wa Gisayo, akagali ka Gasura, umurenge wa Bwishyura, wiga mu mwaka wa 3 w’amashuri abanza, ku kigo cy’amashuri cya G.S Kibuye.

Umuyobozi w’ishuri uyu mwana yigaho Hakizimana Tharcisse yabwiye rwandanews24, uko nabo babimenye ko umwana urererwa ku ishuri ayobora yahohotewe, uwamuhohoteye akaba arimo gukurikiranwa, umwana akaba ataragaruka ku ishuri.

Ati “ikibazo cy’uyu mwana bikekwa ko yafashwe ku ngufu cyamenyekanye kuwa kabiri taliki ya 25/02/2020, bikaba bikekwa ko yafashwe ku ngufu taliki 19/02/2020, ubwo yavuye ku ishuri ntagaruke, bikimara kumenyekana ababyeyi be bahise bamujyana kuri isange one stop center, bagahita bashyikiriza ikirego RIB sitasiyo ya Bwishyura, ubundi ukekwa agahita atabwa muri yombi, akaba arimo gukurikiranwa n’inzego z’ubugenzacyaha, umwana nawe arimo kwitabwaho akaba ataragaruka ku ishuri.”

Umuvugizi wa RIB Umuhoza Marie Michelle twagerageje kumuhamagara kuri telephone ye njyendanwa ntiyabasha kutwitaba. Rwandanews24 irakomeza gukurikirana iki kibazo.

Ingingo ya 191 mu gitabo cy’amategeko ahana ibyaha mu Rwanda ivuga ko umuntu wese usambanyije umwana, ahanishwa igifungo cya burundu y’umwihariko.

Icyo gitabo kigaragaza ko igihe gusambanya umwana byamuviriyemo urupfu cyangwa uburwayi budakira, uwabikoze hejuru y’igifungo cya burundu y’umwihariko ahanishwa n’ihazabu y’amafaranga y’u Rwanda kuva ku bihumbi 500 kugeza kuri miliyoni imwe.