October 19, 2021

Rwandanews24

Publishing Factual, verified and accurate stories

Abantu 29 bari mu gikorwa cy’abashyigikiye minisitiri w’Intebe wa Ethiopie bakomerekejwe n’igisasu

YASUWE 27 

Polisi yo muri Ethiopie yatangaje ko abantu 29 bari mu bitabiriye inama y’abashyigikiye Minisitiri w’Intebe, Abiy Ahmed, bakomerekeye mu gitero cy’igisasu kuri iki Cyumweru mu Mujyi wa Ambo.
Iyi nama yari yateguwe n’abayobozi bakuru b’Umujyi wa Ambo uherereye ku bilometero 100 mu burengerazuba bw’Umurwa Mukuru Addis Abeba, mu rwego rwo kurushaho kwitegura amatora ateganyijwe muri Kanama uyu mwaka.
Umuyobozi Mukuru wa Polisi muri Ethiopie, Arasa Merdasa, yabwiye Ibiro Ntaramakuru byo muri Ethiopie ko abantu 28 mu bakomeretse bahise bavurwa bakoherezwa mu ngo zabo.
Minisitiri w’Intebe wa Ethiopie, Abiy Ahmed, ntiyari muri iyo nama yari yahuje abamushyigikiye.
Polisi yatangaje ko imaze guta muri yombi abantu batandatu bakekwaho kugira uruhare muri icyo gitero cyagaragaje ko muri Ethiopie umutekano utifashe neza mu gihe bari kwitegura amatora ya Minisitiri w’Intebe.
Igitero cyo ku cyumweru gishobora kuba cyaragabwe n’abarwanyi bo mu mutwe wa OLA, ushamikiye ku mutwe w’ingabo witandukanyije na leta witwa OLF.
Umutwe wa OLA kandi ushinjwa kuba ariwo wivuganye umwe mu bayobozi bakuru mu nzego z’umutekano mu gace ka Burayu ko muri Oromia, ku wa gatanu w’icyumweru gishize.
Ku wa 15 Mutarama 2020, nibwo Komisiyo y’Amatora muri iki gihugu yatangaje ko amatora azaba muri Kanama uyu mwaka, igihe kimenyereweho kugwamo imvura nyinshi muri Ethiopie; icyemezo cyakuruye impaka nyinshi mu baturage.
Aya matora ateganyijwe, afatwa nk’igice gikomeye muri politiki y’inzibacyuho yazanywe na Minisitiri w’Intebe, Abiy Ahmed, uherutse guhabwa igihembo cy’amahoro cyitiriwe Nobel mu 2019, nyamara mu gihugu cye hari umwuka w’ubushyamirane hagati y’amoko.
Abiy Ahmed yatangiye inshingano za Minisitiri w’Intebe muri Mata 2018, nyuma y’imyigaragambyo ikomeye yamaganaga guverinoma yari iriho icyo gihe.
Abiy yizeye ko abanya-Ethiopie bazamuha indi manda kugira ngo abashe gushyira mu bikorwa neza amavugurura muri politiki n’ubukungu yiyemeje.
Ibikorwa byo kwiyamamaza ku mugaragaro bizatangira tariki ya 28 Gicurasi 2020, mu gihe ibizava mu matora bizatangazwa bitarenze tariki ya 8 Nzeri uyu mwaka.
Amashyaka abiri atavuga rumwe n’ubutegetsi muri Ethiopie, Front de Libération Oromo (OLF) na Ezema, yari yasabye ko amatora yakwigizwa inyuma y’ukwezi kwa Kanama, kubera ko ari bwo imvura iba yagabanutse muri iki gihugu.
Mu matora y’abagize Inteko Ishinga Amategeko aheruka mu 2015, ihuriro ry’amashyaka arimo n’irya Abiy Ahmed, Front Démocratique Révolutionnaire du Peuple Ethiopien (EPRDF), yari yatsindiye imyanya 547; kuva icyo gihe Minisitiri w’Intebe yahisemo gukora amavugurura yasize ayo mashyaka yose abaye ishyaka rimwe ryiswe ‘‘Parti Ethiopien de la Prospérité’’.

Ethiopia Prime Minster Abiy Ahmed for the Big Read interview from the Ethiopian government press office

Izo mpinduka zitavuzweho rumwe zamaganiwe kure na rimwe mu mashyaka yari agize ihuriro rya (EPRDF), Front de Libération des Peuples du Tigré (TPLF), ryari rifite abayoboke benshi kuruta ayandi kugeza mu 2018.
Mu bushyamirane bushingiye ku moko buheruka mu Ukwakira 2019 mu gace ka Oromia, abantu 86 ni bo bahatakarije ubuzima.
Umwaka wa 2018 warangiye igihugu cya Ethiopie ari cyo kiyoboye ibindi ku isi mu kugira abaturage benshi bavuye mu byabo kubera ubushyamirane n’intambara z’amoko.