October 16, 2021

Rwandanews24

Publishing Factual, verified and accurate stories

Patient Bizimana agiye gutaramira mu Buholandi

YASUWE 34 

Patient Bizimana ni umuhanzi umaze gufatisha imizi mu ndirimbo zo kuramya no guhimbaza Imana, yatumiwe mu gitaramo azahuriramo na Fortran Bigirimana mu Buholandi.
Iki gitaramo cyiswe “Thanksgiving Celebration Live Concert” giteganyijwe kubera Kerkplein1 mu Buholandi ku wa 4-5 Mata 2020. Cyateguwe na Family Fellowship Ministries.
Patient Bizimana araza guhuriramo n’umuramyi Fortran Bigirimana ukomoka mu Burundi, akaba afite ibihangano binyura benshi mu bakunda umuziki uhimbaza Imana.
Bigirimana yakunzwe mu Rwanda binyuze mu ndirimbo zirimo “Ntaco Nzoba”, ‘‘Ni amahoro” n’izindi.
Bikaba biteganyijwe ko Patient Bizimana azahaguruka mu Rwanda mu mpera za Werurwe yerekeza mu Buholandi muri icyo gitaramo.

Ni nyuma y’amezi 2 gusa avuyeyo n’ubundi avuye I Burayi. Aherukayo mu mwaka ushize ku wa 31 Ukuboza 2019 mu Bubiligi mu gitaramo cyabereye mu Mujyi wa Bruxelles yahuriye mo na Gentil Misigaro.
Patient Bizimana akaba yatangaje ko yiteguye neza kuzataramana n’abakunzi b’ibihangano bye ku Mugabane w’u Burayi.
Patient Bizimana asengera muri Evangelical Restoration Church yakoreye ibitaramo mu bihugu hafi ya byose bya Afurika y’Uburasirazuba, yaririmbiye mu Burayi n’ahandi henshi.
Ategura ibitaramo ngarukamwaka bya ‘East Celebration’ byitabirwa n’ibihumbi by’abakunda umuziki we.
Mu 2016 yatumiye Solly Mahlangu wo muri Afurika y’Epfo, Umunya-Nigeria Osinachi Joseph [Sinach] (2018) na Alka Mbumba wiyita ’Umusazi wa Yesu’ (2019) n’abandi.
Umuziki yawutangiye akiri muto aho yatangiye acuranga mu rusengero, bigeze mu 2007 asohora indirimbo ye bwite yitwa ‘Andyohera’. Yakunzwe bihambaye mu ndirimbo nka ‘Iyo neza’, ‘Amagambo yanjye’, ‘Menye neza’, ‘Andyohera’ n’izindi.
Yanditswe na Maniragaba Obed