October 24, 2021

Rwandanews24

Publishing Factual, verified and accurate stories

Imyaka ibiri Manchester City FC idakandagira muri UEFA Champions League

YASUWE 26 

Manchester City FC yo mu Bwongereza yafatiwe n’Impuzamashyirahamwe y’Umupira w’Amaguru i Burayi, UEFA, ibihano byo kutitabira irushanwa rya Champions League mu myaka ibiri iri imbere, kubera ko yarenze ku mategeko agenga amakipe i Burayi mu bijyanye n’umutungo (Financial Fair Play Rules).
Manchester City ifite Igikombe cya Shampiyona y’u Bwongereza giheruka, yaciwe kandi amande ya miliyoni 25 y’ama-pound.
Ubuyobozi bw’ikipe ya Manchester City bwatangaje ko bwatunguwe n’iki cyemezo cya UEFA ndetse bukaba bwiteguye kujurira mu Rukiko Nkemurampaka rwa Siporo (CAS).
Mu Ukuboza kwa 2018 nibwo iperereza ryatangiye kuri iyi kipe ya Manchester City ishinjwa kwica nkana amategeko y’umutungo mu bikorwa by’amakipe, aya mategeko akaba azwi nka Financial Fair Play. Iri perereza rikaba ryarakorwaga na UEFA.
Mu itangazo ryasohowe n’akanama kigenga gashinjwe gukurikirana ibijyanye n’umutungo w’amakipe (CFCB), ryashinjaga Manchester City kubeshya amafaranga yinjije muri raporo yahaye UEFA hagati ya 2012 na 2016 no kuba itarigeze yorohereze aka kanama mu iperereza.

Iri perereza ry UEFA ryatangiye kuri Manchester City nyuma y’uko hagaragaye impapuro mu kinyamakuru Der Spiegel cyo mu Budage mu Ugushyingo 2018, zishyira hanze Manchester City muguhisha amafaranga yabonye mu baterankunga yungutse.
Mu mwaka wa 2014, naho Manchester City yari yaciwe miliyoni £50 bitewe no kwica aya mabwiriza.
Aya mategeko ya Financial Fair Play (FFP), yashyizweho na UEFA mu 2009 mu rwego rwo kurinda amakipe ari mu marushanwa yayo gutakaza amafaranga arenze ubushobozi bwayo, harebwe ku yinjizwa.
Muri aya mategeko, ikipe iba igomba kumenyekanisha amafaranga yatakanze n’ayo yinjije mu bikorwa bitandukanye.
Bivugwa ko kandi Manchester City ishobora guhanishwa gukurwaho amanota muri Premier League kuko amategeko ya Financial Fair Play muri Shampiyona ari amwe n’ubwo adahura neza n’aya UEFA.
Ibi bihano birareba by’umwihariko ikipe y’abagabo ya Manchester City. Iyi kipe iheruka gutombora Real Madrid muri 1/8 cya UEFA Champions League y’uyu mwaka, aho umukino ubanza uzabera muri Espagne tariki ya 26 Gashyantare 2020.
Ibi bihano bya Manchester City bibaye byemejwe nyuma y’ubujurire, muri UEFA Champions League itaha, ishobora kuba yasimbuzwa ikipe yaza ku mwanya wa hafi muri Shampiyona y’u Bwongereza nk’uko amategeko ya UEFA abiteganya.
Yanditswe na Maniragaba Obed