October 19, 2021

Rwandanews24

Publishing Factual, verified and accurate stories

Coronavirus yakajije umurego yica abantu 97 umunsi umwe

YASUWE 15 

Umubare w’abantu bishwe na coronavirus wazamutseho abantu 97 ejo ku cyumweru taliki ya 9 Gashyantare 2020, niwo mubare munini w’abantu iyi ndwara yishe ku munsi umwe.

Iyi ndwara ntabwo kugeza ubu iragera ku mugabane wa Afurika. Ibihugu bya Afurika byafashe ingamba zo kwirinda no kwitegura guhangana n’iyi virus niramuka ihageze.

Mu biganiro by’inama rusange y’Umuryango w’Ubumwe bwa Afurika iteraniye i Addis Ababa uyu munsi kuwa mbere taliki ya 10 Gashyantare 2020, biteganyijwe ko banaganira kuri iyi virus n’uko Afurika yiteguye.

KWAMAMAZA

Umubare w’abantu iyi ndwara imaze kwica mu Bushinwa ubu ugeze kuri 908  gusa umubare w’abayanduye bamenyekana ku munsi ntiwiyongereye.

Mu Bushinwa, abantu 40,171 banduye iyi virus mu gihe abandi 187,518 barimo gukurikiranirwa hafi n’abaganga.

Ishami ry’umuryango w’abibumbye ryita ku buzima (OMS/WHO) ryohereje itsinda ry’inzobere i Beijing gufasha gukora ubushakashatsi kuri iyi virus.

Imibare ya leta y’Ubushinwa ivuga ko abantu 3,218 bari barwaye iyi ndwara bayikize ndetse basezerewe mu bitaro bagataha.

Uyu munsi, miliyoni z’abaturage mu Bushinwa bongeye gusubira mu mirimo nyuma y’ibiruhuko by’umwaka mushya byongerewe uhereye taliki 31 Mutarama 2020 kubera iyi virus.

Gusa haracyari ibikorwa bikomeye byo kwirinda iyi virus birimo kugabanya amasaha y’akazi no guhitamo ahantu hamwe na hamwe imirimo iba itangiye.

Muri iyi weekend nibwo imibare y’abishwe na coronavirus yarenze iyabishwe na virus ya Sars yavuye mu Bushinwa mu 2003 ikica abantu 774 ku isi yose.

Abantu 97 bahitanywe na coronavirus umunsi umwe wo ku cyumweru taliki ya 9 Gashyantare 2020

Amakuru mashya yo mu gitondo cyo kuri uyu wa mbere taliki ya 10 Gashyantare 2020 aravuga ko abandi bantu 60 biyongereye kuri 97 bahitanywe na coronavirus ejo, bakaba bamaze kuba 136 nk’uko ikinyamakuru Nytimes dukesha iyi nkuru cyabitangaje.

Iyi virus nshya yo mu bwoko bwa corona yabonetse bwa mbere mu mujyi wa Wuhan, umurwa mukuru w’intara ya Hubei.

Ni umujyi utuwe n’abaturage miliyoni 11 ubu usa n’uwafunzwe mu byumweru byinshi bishize.

Iyi virus ubu imaze kugera mu bihugu 27 ku isi, gusa kugeza ubu hanze y’Ubushinwa imaze kwica abantu babiri, muri Philippines no muri Hong Kong.

Muri Afurika, abantu bose bitabiriye imirimo y’inama rusange y’umuryango w’ubumwe bwa Afurika muri Ethiopia barabanza gusuzumwa mbere yo kwinjira mu nama.

Iyi virus iraza kuganirwa muri iyi nama bareba ibyakorwa byo kuyinrinda n’ibyakorwa mu gihe yaba igeze muri Afurika.

Kugeza ubu ibihugu 15 muri Afurika nibyo bifite ubushobozi bwo gusuzuma iyi virus nshya.

U Rwanda narwo ni kimwe mu bihugu bishyize imbaraga mu guhangana n’iki cyorezo cya Coronavirus nk’uko Minisitiri w’Ubuzima Dr. Diane Gashumba aherutse ku bitangaza mu kiganiro n’itangazamakuru.