October 19, 2021

Rwandanews24

Publishing Factual, verified and accurate stories

Dr. Gashumba na mugenzi we, Corneille barasobanura iby’icyorezo cya Coronavirus bivugwa ko cyageze mu Rwanda

YASUWE 14 

Mu gihe isi ihangayikishijwe n’icyorezo cya Novel Coronavirus cyaturutse mu Bushinwa, ibihugu bifiteyo abaturage byabasabye kwigengesera ndetse ingendo zo mu kirere mpuzamahanga zijya mu migi nka Hubei na Wuhan zirahagarara. Mu Rwanda, hari video yakwiye ku mbuga nkoranyambaga yavugaga ko iyi virusi yaba yarahageze, bamwe bacika igikuba.

Video iri kuri ‘YouTube Channel’ ya Ishakiro TV igaragaza Minisitiri w’Ubuzima, Dr. Diane Gashumba n’abandi bakozi bo muri uru rwego basobanura uburyo mu Rwanda, hakozwe ubushakashatsi ku ducurama 203, dusangwamo agakoko ka Coronavirus, ari yo mpamvu Abanyarwanda basabwa kwirinda gukora ku nyamaswa zo mu ishyamba cyangwa amatungo yo mu rugo nta turindantoki (gloves) bambaye.

Iyi video yageze ku mbuga nkoranyambaga ifite amasegonda 30 gusa, bikaba bivugwa ko idasobanura neza iby’ubu bushakashatsi kuko ngo bwakozwe mu myaka irindwi ishize, ikindi ubu bwandu bwa Coronavirus butandukanye n’ubu bushya bwa Novel Coronavirus nk’uko umuyobozi w’ibitaro bya Byumba, Dr. Corneille Ntihabose yabisobanuye.

KWAMAMAZA

Dr. Diane Gashumba yagize ati: “Inyamaswa zishobora kugira iyi virusi, ariko ntabwo iragaragara ku Banyarwanda. Umuryango nyarwanda ukomeze ube maso mu rwego rwo kwirinda iki cyorezo.”

Dr. Corneille Ntihabose asobanura byimbitse ku itandukaniro hagati ya Coronavirus na Novel Coronavirus: “Ubwoko bwa Coronaviruses butera indwara mu bantu bumaze kumenyekana ni 7: HCoV-229E, HCoV-OC43, SARS-CoV, HCoV-NL63, HKU1, MERS-CoV na Novel Coronavirus, ari bwo bushya bwatangiye kugaragara mu Bushinwa mu Kuboza 2019, nyuma y’ubushakashatsi bwakozwe icyo gihe.

Kwirinda indwara ya Coronavirus

Gukaraba intoki buri gihe ukoresheje amazi meza n’isabune cyangwa alcohol yegenewe gusukura intoki, mu gihe ukoroye cyangwa witsamuye, pfuka ku munwa no ku mazuru, ukoresheje agatambaro gasukuye, uhite ukajugunya ahagenewe guta imyanda, hanyuma uhite ukaraba intoki n’amazi meza n’isabune.

Kwirinda gukora ku muntu uwo ari we wese ufite inkorora n’umuriro, guteka inyama n’amagi bigashya neza mbere yo kubirya no kwirinda gukorakora ku nyamaswa zo mu ishyamba cyangwa andi matungo yororerwa mu rugo utambaye uturindantoki.