October 20, 2021

Rwandanews24

Publishing Factual, verified and accurate stories

Capt. Herman Nsengimana wari umuvugizi w’umutwe wa FLN na Mutarambirwa Theobald beretswe itangazamakuru

YASUWE 136 

Urwego rw’Igihugu rw’Ubugenzacyaha rwerekanye, kuri uyu wa 17 Mutarama 2020 Capt. Herman Nsengimana wari umuvugizi w’umutwe wa FLN urwanya ubutegetsi bw’u Rwanda ndetse na Mutarambirwa Theobald wari ushinzwe kwinjiza urubyiruko muri uyu mutwe, bombi bafatiwe bari bahanganyemo n’abarwanyi ba Mai Mai Raia Mutomboki.

Iki gihe uyu mutwe ukomoka muri Congo wari wiyemeje guhangana n’imitwe ikomoka mu mahanga, icyo gihe ngo abarwanyi ba FLN bagera kuri 60 bashobora kuba barakomerekeyemo, abandi bagafatwa harimo n’aba babiri bahise bashyikirizwa ingabo z’igihugu muri teritwari ya Fizi.

Amakuru y’ifatwa rya Capt. Nsengimana yagiye hanze tariki ya 11 Ukuboza 2019, ubwo byatangajwe ko na Brig. Gen. Antoine Hakizimana uzwi nka Jeva wari ushinzwe ibikorwa bya operasiyo n’iperereza na we yafashwe icyo gihe, bombi ari bazima.

Ifatwa rya Theobard wabaye umunyamabanga wa PS Imberakuri kugeza mu 2010, ryo ntabwo ryigeze rivugwaho byinshi gusa umuvugizi w’Urwego rw’Ubugenzacyaha, Marie Michelle Umuhoza yatangaje ko bafatiwe mu bitero ingabo za Congo zikomeje kugaba ku mitwe yitwaje intwaro y’inyamahanga icumbitse mu mashyamba y’igihugu, bakaba barashyikirijwe u Rwanda tariki ya 16 Ukuboza 2019.

KWAMAMAZA

Amakuru avuga ko Capt. Nsengimana yavuye mu Rwanda mu 2014, ajya kwihuza n’ishyaka rya Nsabimana Callixte (Maj. Sankara) ryitwa Rwandese Revolutionary Movement ryinjiye mu ihuriro rya CNRD/MRCD, rigira uyu mutwe witwara gisirikare wa FLN. Mu bitero uyu mutwe wigambye mu duce tw’amajyepfo y’uburengerazuba twegereye ishyamba rya Nyungwe, Maj. Sankara ni we wari umuvugizi, Capt. Nsengimana amusimbura nyuma yo gufatirwa mu birwa bya Comores.

Umwaka w’ 2019 wabaye mubi ku mitwe irwanya ubutegetsi bw’u Rwanda iri mu mashyamba ya RD Congo, bikomera kurushaho guhera tariki ya 30 Ukwakira 2029, ubwo ku mugaragaro, ingabo z’iki gihugu zatangizaga Operasiyo Sokola 2 ku mitwe yitwaje intwaro mu ntara za Kivu zombi. Abarwanyi b’iyi mitwe n’abayobozi babo bamwe barafatwa, abandi baricwa, habamo no gushyikiriza u Rwanda bamwe muri bo, hiyongereyeho n’imiryango yabo ubu bacumbikiwe mu nkambi ya Nyarushishi, aho bari gutozwa kubana n’abo basanze mu gihugu. Muri iyi nkambi habayemo igenzura rigamije kureba niba hari ababa barakoze ibyaha birimo na Jenoside yakorewe Abatutsi kugira ngo bagezwe imbere y’ubutabera.