October 20, 2021

Rwandanews24

Publishing Factual, verified and accurate stories

Gicumbi: Hashize amezi 3 umumotari aburiwe irengero

YASUWE 21 

Umugore witwa Furaha Mukafaranga utuye mu Kagari ka Kigabiro mu Murenge wa Bukure avuga ko yabuze umugabo we, Issa Nyirinkindi kuwa 8 Ukwakira 2019 kugeza ubu kaba atazi aho aherereye.


Uyu mugore avuga ko iby’uko umugabo we yaba yabuze yabibwiwe n’abaturanyi babivuze bakekeranya, babivugaga bagendeye kuri telefoni bumvise yitabwa n’Umunyambanaga Nshingwabikorwa w’Akagari ka Kigabiro, Beatrice Uwamariya asabwa ibisobanuro bijyanye n’imyitwarire ya Nyirinkindi.

Mukafaranga yabajije gitifu Uwamariya iby’uwo wamuhamagaye amubaza kuri Nyirinkindi ukora akazi ko gutwara abantu kuri moto. Gitifu yamwemereye ko yavuganye n’uwo muntu wakoresheje telefoni ya Nyirinkindi.

Yabwiye Radiyo Ijwi rya Amerika ati ” Njyewe nabimenye kuko umuntu wumvise gitifu avugana n’uwo muntu mu isantere. Naravuze nti reka ndeke kumva amagambo y’abantu, mbaze gitifu. Uko wabyumvise kubera ko nari mu bantu benshi, nkabivuga banyumva, ni uko nguko byagenze.”

Mukafaranga akomeza agira ati ” Yavuye mu rugo agiye mu kazi. Uwo muntu wamufashe yahise ahamagara gitifu w’akagari,  ariko akoresheje telefoni ye. Yaramubajije ngo uri nde undi avuga ko ari umupolisi ukorera kuri Sitasiyo ya Nyarugenge. Yamubajije utubazo twinshi, ngo ese uyu muturage wawe bite?  Undi ati ni umumotari usanzwe udutwara.  Ese yaba yarabaye umusirikare, ati oya,  nta na rokodifensi [local defence]. Naratashye njya kuri RIB [Urwego rw’Igihugu rw’Ubugenzacyaha] mu murenge, ndabibabwira.”

Umunyamabanga Nshingwabikorwa w’Umurenge wa Bukure, Sylivestre Nkundabera yemeje ko Nyirinkindi yabuze kandi ko inzego z’umutekano zamenyeshejwe icyo kibazo.

Undi muyobozi mu Murenge wa Bukure utashatse ko amazina ye atangazwa, yabwiye Radiyo Ijwi rya Amerika ko Nyirinkindi yabuze, akaburira i Kigali.

Ati (…) ” Natwe ni uko tubizi, twabwirwaga ko Nyirinkindi afungiwe kuri sitasiyo ya polisi iri i Kigali.”

Umuvugizi w’Urwego rw’Igihugu rw’ubugenzacyaha (RIB), Marie Michelle Umuhoza avuga ko uru rwego rwakiriye ikirego cy’ibura rya Nyirinkindi kandi ko rurimo kugikoraho iperereza. Nta byinshi yashatse gutangaza.

Ati ” Nsanze iki kirego twaracyakiriye ndetse n’iperereza ryaratangiye. Ibikorerwa mu iperereza bikorwa mu ibanga.”

Mukafaranga asaba ubuyobozi kumufasha kumenya irengero ry’umugabo we ndetse akavuga ko na moto yakoreshaga na nayo batazi aho iherereye.

Nyirikindi abuze mu gihe hari n’abandi baturage bavuga ko babuze abantu babo. Umuryango wo mu Karere ka Gisagara uvuga ko wabuze umuntu wabo,  Evariste Nzabarinda wakoraga ku mupaka wa Rusumo.

Mu ntangiro z’uku kwezi kwa Mutarama 2020 kandi habuze Niyitegeka Augustin wari warashinze ishyaka NDP. Uyu yaburiye ku mupaka w’u Rwanda n’Uburundi kuwa 1 Mutarama 2020.

Inzego z’umutekano zikomeza kuvuga ko zakiriye ibirego kuri iri bura kandi ko zirimo  gukora iperereza.