October 24, 2021

Rwandanews24

Publishing Factual, verified and accurate stories

Dore uko Col. Bagosora yacuze umugambi wo kuvana munzira Habyarimana ngo abone uko yica Abatutsi nta mususu

YASUWE 34 

Imyaka 26 irashize habaye Jenoside yakorewe Abatutsi mu Rwanda mu 1994, uko iminsi ishira hakomeza kugenda hagaragara ibimenyetso bitandukanye bigaragaza kandi bigashimangira ko Jenoside yakorewe Abatutsi yateguwe n’ubwo hari abakomeje guhakana ko itabaye , abakayipfobya , abandi bakavuga ko habaye ebyiri.

Ibi ni bimwe mu bikubiye mu itangazo rigenewe Abanyamakuru rya Komisiyo y’igihugu yo kurwanya Jenoside CNLG yashyize hanze, rigaragaza bimwe mu bikorwa simusiga byakozwe hagati y’italiki ya 13 na 19 Mutarama kuva mu 1991 kugeza mu 1994, bigaragaza uko Jenoside yagiye itegurwa, n’uruhare amashyaka akomeye mu gihugu n’abari abategetsi bakomeye bagiye babigiramo.

                   Kwamamaza

Urugero nk’itangazo ryasohowe n’ishyaka MDR ku wa 15 Mutarama mu 1993, rigaragaza ko Col. Theoneste Bagosora ari we wari uyoboye urugamba rwo kwica Abatutsi, ariko umugambi we akaba yaragombaga kuwugeraho abanje kwivugana Perezida Habyarimana wagendaga biguru ntege mu kuwushyira mu bikorwa.

Twibukiranye ko Bagosora yari umutoni wa Habyarimana dore ko yari umugaba mukuru w’ingabo z’u Rwanda, gusa umubano wabo ukaza kuzamo agatotsi bitewe n’uko aba bombi batajyaga imbizi ku bijyanye n’amasezerano y’Arusha yemereraga Abatutsi bari barameneshejwe ko bahabwa uburenganzira bwo kugaruka mu Rwanda.

Ku bwa Bagosora n’abambari be nka Col Nsengiyumva, Col. Sagatwa na Major Nkundiye wari ukuriye aba GP barindaga Perezida Habyarimana, intego yabo  kwari ugukomeza kwica Abatutsi urusorongo nk’uko byakorwaga, gusa baza gukomwa mu nkokora n’ingabo z’igihugu cyane cyane abari bakuriye za Jandarumori.

Iri tangazo rikomeza rigira riti: “Bagosora yatangiye uburiganya bwo gushaka uko abakuru ba jandarumori muri Kigali bahindagurwa abandi bakicwa, ngo kugira ngo hashakwe abo bahuje umugambi w’Abanyakazu.”

’Akazu’ kari agatsiko k’abategetsi bakuru b’igihugu bari bafite inkomoko mu ma Perefegitura ya Gisenyi, Ruhengeri na Byumba, umugambi wabo ukaba wari ugukomeza guheza Abatutsi ishyanga ndetse no gushaka uko abari mu gihugu na bo bahumbahumbwa.

Bijyanye n’uko Habyarimana yagendaga biguru ntege muri uyu mugambi ndetse yari yagambanye akemera gusinya amasezerano y’amahoro, Bagosora we ubwe yateguye uko yakwikiza ’Ikinani’ binyuze muri Coup d’Etat yashoboraga kumwohereza ishyanga n’umuryango we.

Ibi byose byari kugira ngo mu gihe Habyarimana yaba apfuye cyangwa ahunze, Bagosora na Nkundiye bari bahuje umugambi basigare bafite igihugu mu maboko yabo ndetse banasoze umugambi mubisha wo gushyiraho imperuka y’Abatutsi bari barateguye.

Hari n’ibindi bikorwa bigaragaza uburyo Jenoside yari yarateguwe, birimo ishingwa ry’ibitangazamakuru byabibaga inzangano n’amacakubiri, gutoteza abategetsi b’Abatutsi batandukanye nka Dr. Habyarimana Jean Baptiste wari Perefe wa Butare bikozwe n’amashyaka nka MRND na CDR, iyicwa ry’Abatutsi benshi ku wa 19 Mutarama mu 1993, Raporo ya Ambasaderi w’Ubufaransa yo ku wa 12 Mutarama 1994 igaragaza buryo abarenga 1,000 bagombaga kwicwa mu isaha ya mbere ya Jenoside ndetse n’inama y’amashyaka ya Hutu Power yo ku wa 16 Mutarama 1994 yasabaga ubwirinzi Abatutsi ndetse n’ingabo z’Ababiligi zari mu Rwanda.