October 24, 2021

Rwandanews24

Publishing Factual, verified and accurate stories

Abarwayi ba CNRD/ FDLR n’imiryango yabo basesekaye ku bwinshi muri Teritwari ya Mwenga baruta ubwinshi abaturage

YASUWE 18 

Abantu 500 barimo inyeshyamba za CNRD (Conseil National pour la Renaissance et la Démocratie) n’imiryango yazo bakambitse muri Teritwari ya Mwenga nyuma yogushwiragizwa n’igisirikare cya Congo (FARDC) mu duce zari zarigaruriye.

Izi nyeshyamba n’abazikomokaho bageze mu duce two muri iyi teritwari ku wa Gatanu taliki ya 20 Ukuboza 2019, nyuma yo gushwiragizwa na FARDC muri Kalehe na Kabare, zo muri Kivu y’Amajyepfo.

Umwe mu batuye muri aka gace izi nyeshyamba zagezemo, yagize ati “Izo nyeshyamba zaje ku bwinshi ziruta abaturage ba gurupoma ya Banamocha. Ni abasaga 500 barimo abarwanyi n’imiryango yabo ubu biganje muri Teritwari ya Mwenga. Abaturage bo muri Zone ya Bazile bafite ubwoba bw umutekano muke kubera izo nyeshyamba zabagezemo, tukaba ngo ni ukugeza ryari bazagendera”.

Yakomeje avuga ko aba bantu baherereye hagati y’agace ka Kamikili na Kashombo muri Gurupoma ya Banamocha, muri iyi Teritwari ya Mwenga.

Abaturage bo muri utu duce bakaba basabwa ’gutanga amakuru ku bikorwa babona muri gurupoma yabo, abo babonye bambaye imyanda itari iy’ingabo za Leta n’abafite intwaro bakabatangira amakuru,….”

Ikinyamakuru 7sur7 dukesha aya makuru, kiganira n’umwe mu bavugizi ba FARDC mu Ntara ya Kivu y’Amajyepfo, Capt. Dieudonné Kasereka yemeje aya makuru asaba abaturage gukorana n’igisirikare cya Leta kugira ngo izi nyeshyamba za CNRD/FDLR zifungirwe amayira mu mpande zose.

Umutwe wa CNRD (National Council for the Renaissance and Democracy) wiyomoye kuri FDLR ukaba ufite intego yo kurwanya Leta y’u Rwanda. Umaze hafi ukwezi ugabwaho ibitero muri iyi ntara ya Kivu y’Amagepfo, bamwe bakicwa abandi bagafatwa mpiri, abandi bagatatana bakwira imishwaro.

Ku wa Kane w’iki cyumweru abarwanyi 56 b’izi nyeshyamba za CNRD/FDLR bafashwe mpiri n’igisirikare cya Leta, mu duce twa Nzibira na Nindja. Mu gihe Leta ya Congo itangaza ko ifite abasaga 1721 yafashe, 291 bacyuwe mu Rwanda abasaga 1600 bakaba bacumbikiwe mu nkambi ya gisirikare ya Nyamunyunyi muri Teritwari ya Kabare bitazwi uko bizabagendekera.

Ibyo kurwanya iyi mitwe yitwara gisirikari bikaba byaratangiye kuva aho umukuru w’ igihugu Félix Tchisekedi agiye ku butegetsi wiyemeje mu byihutirwa ko byanga byakunda agomba kurangiza intambara, akagarura amahoro mu Burasirazuba bwa Congo, byanashoboka akabibera igitambo.

Abantu benshi bakaba bakomeza kwibaza uko azabigeraho mu gihe mu gihugu cyose habarirwa imitwe y’inyeshyamba isaga 150, ibintu bigaragara ko bitazamworohera kubera ubwinshi bwiyo mitwe. Muri iki gihe akaba afite umukoro utamworoheye wo kurwanya inyeshyamba nyirizina azitandukanya n’abasivili bamaze kubigwamo atari bake.