October 16, 2021

Rwandanews24

Publishing Factual, verified and accurate stories

Uganda: Icyo Minisitiri Mateke yavuze ku ruhare ashinjwa mu gitero cya RUD Urunana i Musanze

YASUWE 42 

Umunyamabanga wa Leta ya Uganda ushinzwe ubutwererane mu karere, Philemon Mateke arahakana uruhare rwe mu gitero cyagabwe mu Karere ka Musanze mu ntangiriro z’Ukwakira 2019. Ni nyuma y’uko havuzwe ko hari ibimenyetso byo gufasha abarwanyi ba RUD Urunana muri iki gitero.

Taliki ya 13 Ukuboza 2019 ni bwo komisiyo ihuriweho n’ibihugu by’u Rwanda na Uganda yakoze inama ya kabiri i Kampala, irangira nta kigezweho. Iyi nama yari igamije gukemura ibibazo ibihugu byombi bifitanye, ikaba yarigaga ku bikubiye mu masezerano y’I Luanda muri Angola yo ku wa 21 Kanama 2019, abakuru b’ibihugu byombi bashyizeho umukono bahujwe na Perezida Laurenco.

Nyuma y’iyi nama y’i Kampala, byavuzwe ko itangazamakuru ryashatse kuvugana n’Umunyamabanga wa leta ya Uganda ushinzwe ubutwererane mu karere, Minisitiri Philemon Mateke ariko uruhande rwa Uganda rurabyanga.

Olivier Nduhungirehe, Umunyamabanga wa Leta y’u Rwanda muri Minisiteri y’Ububanyi n’Amahanga yahamije ko Uganda ifasha imitwe irwanya ubutegetsi bw’u Rwanda. Yavuze ko mu iperereza ryakozwe kuri iki gitero k’i Musanze tariki ya 4 n’iya 5 Ukwakira, hatanzwe ubuhamya ndetse haboneka na telefone bigaragazamo uruhare rwa Philemon Mateke nk’uko Bwiza yabyanditse.

Amb. Nduhungirehe yakomeje avuga ko Philemon Mateke yakoranaga bya hafi na Nshimiye uzwi nka Governor, uyu akaba ari umuyobozi w’umutwe w’ingabo zidasanzwe (Special Forces) wa RUD Urunana kandi na we akaba aba mu karere ka Kisoro muri Uganda.

Minisitiri Mateke mu nkuru ya The Daily Monitor ati: “Ntabwo ndi umunyarwanda kandi sindi umusirikare w’umunyakiraka (mercinary). Nta bushobozi mfite bwo gufasha imitwe irwanya ubutegetsi bw’u Rwanda.”

U Rwanda rukomeje gushinja leta ya Uganda gufasha imitwe irwanya ubutegetsi bwarwo irimo RNC ya Kayumba Nyamwasa bivugwa ko yamaze guhabwa aho gukorera muri iki gihugu ndetse na RUD Urunana.

RUD Urunana yagabye igitero i Musanze mu mirenge ya Kinigi, Musanze na Nyange mu minsi ibiri, aho muri Musanze na Kinigi abaturage 14 bahasize ubuzima, abandi 16 barakomereka. Muri aba bapfuye barimo abaguye mu bitaro bya Ruhengeri aho bavurirwaga.

Ubuhamya abaturage batanze, bavuze ko aba barwanyi baje mu ijoro babaririza kamwe mu duce turi mu karere ka Musanze, kikaba cyarabaye ikimenyetso ko hari abantu bashobora kuba babarangiraga inzira. Byakurikiranye n’iperereza ryari rigamije gushaka umuntu wese wabigizemo uruhare.

Aba barwanyi bafashwe batangarije itangazamakuru ko intego bari bafite ari ugufata igihugu ariko abaturage bakavuga ko baje babica bunyamaswa; babicisha ibyuma ndetse n’amabuye, abandi bakabarasa. Bati: “Umuntu ushaka gufata igihugu, akaza yica inzirakarengane ubwo aba atekereza ngo ni bande azayobora mu gihe yabishe?”

Umubano w’ibihugu byombi umaze imyaka irenga ibiri utifashe neza, buri gihugu gishinja ikindi gushaka guhungabanya umutekano w’ikindi. U Rwanda rushinja Uganda kurufungira abaturage mu buryo butemewe no kubakorera iyicarubozo, ndetse no gufasha imitwe irwanya ubutegetsi bwarwo, mu gihe Uganda yo ibihakana, ikavuga ahubwo ko Abanyarwanda ibafungwa baba ari intasi, zihohotera zikanashimuta impunzi, kandi ko idafasha umutwe uwo ari wo wose ugamije kurwanya u Rwanda.

Uganda kandi ishinja u Rwanda gufunga imipaka ihuza ibihugu byombi abaturage bakabuzwa kwambuka, ubucuruzi bwambukiranya imipaka bugahagarara, no kurasa abaturage bayo nk’uko byabaye ku mupaka wa Gatuna/Katuna. Ku kijyanye n’iraswa ry’abaturage ba Uganda, ku ruhande rw’u Rwanda byasobanuwe ko bari bashaka kwambutsa ibicuruzwa mu buryo butemewe, bashaka no guhangana n’inzego zishinzwe umutekano.