October 26, 2021

Rwandanews24

Publishing Factual, verified and accurate stories

Nyarugenge: Abaturage bo mu Rwampara bahawe isaha 1 ngo babe bimutse banga kuhava

YASUWE 38 

Abaturiye igishanga cya Rwampara, kiri mu Kagari ka Rwampara, Umurenge wa Nyarugenge, Akarere ka Nyarugenge, mu mujyi wa Kigali, bakoze igisa no kwigaragambya nyuma yo gusabwa kuhimuka, bo bakifuza ko babanza guhabwa ingurane.

Ubuyobozi bubasaba kwimuka muri aka gace by’igihe gito mu rwego rwo kwirinda ko bagirwaho ingaruka n’ibiza, bo bavuga ko bahatuye imyaka myinshi ibyo biza nta byahigeze, bakifuza ko niba ari icyemezo bwafashe cyo kubimura bwabaha ingurane.

Umusaza uri mu kigero cy’imyaka 75 aragira ati “Twahatuye mu 1989, tuhamaze imyaka 30, nta kiza kigeze kigera hano, ariko ubuyobozi bukaza ngo nimuve hano mugende nta n’urumiya baduhaye? ntabwo twanze iterambere nibaze batubarire baduhe icyo baduha tujye gushaka ahandi tuzashyira imiryango yacu”.

Flash Tv itangaza ko bakoze igisa no kwigaragambya nyuma y’aho babwiriwe ko mu isaha imwe baba bavuye muri aka gace bari batuyemo. Ati “Baje saa Cyenda (15:00) ngo Saa kumi mube mumaze kuva hano, bibaho? Kuva twaba hano nta kiza kigeze kiba hano. Mutuvuganire kuko abaturage ba Rwampara ndareba turenganye”.

“Wowe nk’umuyobozi niba ubona ko ari ngombwa tubwire mbere y’igihe uti mwebwe baturage igihe n’iki muzabe mwavuye hariya’ ntabwo tugomba kwanga, umaze kuduha ingurane, ubutaka bwacu turabusorera, ariko ntutujyane nk’Ihene, n’Ihene urayishorera ukajya kuyiha ubwatsi”.

Aba baturage basabwaga kujya kuba mu mashuri muri Camp Kigali, uyu ati “Njyewe ntabwo najyayo, ntabwo nava mu nzu yanjye kuko yaranduhije ubwo kunjyana ahantu ndibwa n’imibu, abana banjye bahavane izindi ndwara ntazi nanjye nzihakure birutwa n’uko bapfira iruhande rw’inzu yanjye”.

Umudamu uri mu kigeri cy’imyaka 35, ati “Ariko se twajya kuba impunzi nta sasu tureba, turahunga iki se ko ibyo biza bavuga ntabyo nari nabona, nabyirukiye ahangaha ndinze ngira imyaka 35 nta muntu nari numva wasenyewe n’ibyo biza bavuga”.

Aganira na Bwiza.com, Ushinzwe itangazamakuru mu Karere ka Nyarugenge, Serugendo Jean de Dieu yavuze ko aba baturage basabwe kuba bimutse by’igihe gito nyuma bakazasubira mu ngo zabo.

Yagize ati “Ikigo cy’igihugu gishinzwe iteganyagihe cyagaragaje ikibazo gikomeye cy’imvura igiye kugwa, basabye ko hari abantu batuye ahantu hashobora kuba ikibazo ko baba bimutse, ubuyobozi bwabasabye ko baba bimutse iminsi 10, imitungo yabo iraguma aho ngaho nyuma bazayisubiramo.

Avuga ko iki kigo gitangaza ko imvura nyinshi ishobora kuzagwa hagati y’italiki ya 8 -31 Ukuboza 2019, ariko ko hagati ya 8-20 aribwo ngo hazagwa ikaze cyane, n’aba baturage bakaba basabwe kuba bavuye mu ngo zabo kugeza kuri iyi taliki ya 20 Ukuboza 2019.

Ku birebana n’imibereho yabo, ati “N’ubundi ni abantu basanzwe bafite uko babayeho, ariko twari turimo kuvugana na Croix Rouge ku buryo yabaha ibiringiti n’ibindi.

Avuga ko hari abari basanzwe bakodesha, ko abo bahisemo kujya gukodesha ahandi. Abafite ubushobozi nabo bakaba bashatse aho baba bagiye gukodesha ukwezi kumwe bakazagaruka nyuma, aho kujya kuba mu mashuri Camp Kigali. Naho abari banze kuhava nabo ngo bakaba babiterwaga no kudasobanurirwa neza,

Yavuze ko aba baturage basabaga ingurane kandi badakuwe mu mitungo yabo, akavuga ko atari abatuye Rwampara gusa ngo kuko ni igikorwa kirimo gukorwa mu mirenge yose.

Abatuye Rwampara bajyanwe kuba bacumbitse mu mashuri ya Camp Kigali, abo muri Nyakabanda bari mu Kigo cya Kabusunzu, Kimisaga bari mu cya Kamuhoza,…