October 20, 2021

Rwandanews24

Publishing Factual, verified and accurate stories

U Rwanda rwasubije Abadepite bo mu Bwongereza ku irekurwa rya Col Byabagamba na Rusagara

YASUWE 16 

U Rwanda rwasubije bamwe mu badepite b’Ubwongereza barwandikiye basaba irekurwa rya Col Tom Byabagamba na Jenerali (Rtd) Frank Rusagara, ruvuga ko mu gihe urubanza rw’ubujurire rwabo rugikomeza bibujijwe kurujyaho impaka.

Mu itangazo ryashyizweho umukono na Minisitiri w’ubutabera Johnson Busingye ryasohotse ejo ku wa gatatu taliki ya 6 Ugushyingo 2019  u Rwanda ruvuga ko hari ubwo leta ishobora  kugira uruhare mu rubanza.

Ibyo biba gusa iyo yabisabwe n’inzego z’ubucamanza bireba, kuko ubundi byaba “bidakwiye ko leta igira icyo ivuga ku rubanza rurimo  kuba, gushaka kugena uko rucibwa, cyangwa kurugiramo uruhare, nk’uko mubisaba mu ibaruwa yanyu”.

Bwana Busingye akomeza avuga ko bitabaye muri ubwo buryo, “byaba ari ukwivanga bidakwiye mu bucamanza bwigenga” bw’u Rwanda.

Yongeraho ko amategeko y’u Rwanda ateganya uburyo busobanutse bwo gusaba kubabarirwa kandi ko Col Byabagamba na Rusagara “bemerewe kubukoresha, bisunze ibiteganywa n’amategeko”.

Abo badepite basaba iki?

Ku wa mbere w’iki cyumweru taliki ya 4 Ugushyingo 2019, abadepite batandatu bo mu Bwongereza bandikiye u Rwanda basaba ko Col Byabagamba na Rusagara barekurwa kubera ko ubuzima bwabo butameze neza.

Bombi batawe muri yombi mu 2014 ku byaha byo “gukwiza ibihuha”, “guhindanya isura y’igihugu n’iya leta”, kuri Byabagamba hakiyongeraho “guhisha ibimenyetso” no “gusuzugura ibendera ry’igihugu”.

Abo badepite bavuga ko ibyo byaha bigaragara ko ari ukunenga bidakorewe mu ruhame, ko igifungo cy’imyaka 21 kuri Byabagamba n’imyaka 20 kuri Rusagara “bihabanye” n’ibyo byaha bahamijwe.

Abo badepite bavuga kandi ko abo bagabo baburanishirijwe hamwe mu rukiko rwa gisirikare mu gihe Rusagara yari umusivile nyuma yo gushyirwa mu kiruhuko.

Banavuga ko aho bafungiwe hameze nabi, bigatuma uburwayi bwabo,  kanseri ya prostate kuri Rusagara n’uburwayi bwatumye Col Byagamba abagwa mu mugongo  burushaho kumera nabi.

Abo badepite bavuga ko kurekura abo bafungwa barwaye “byagaragariza Ubwongereza n’amahanga ko u Rwanda rugirira impuhwe imfungwa zirwaye zamaze gufungwa igihe kirekire”.

Mu 2016 nibwo urukiko rukuru rwa gisirikare rwa Kanombe rwatakiye Col Byabagamba na Rusagara. Bahise bajurira, ariko ubujurire bwabo bwatangiye kuburanishwa mu ntangiriro z’uyu mwaka wa 2019.

Inkuru yabanje: http://Abadepite bamwe mu Bwongereza bandikiye Perezida Kagame bamusaba gufungura Col Byabagamba na Rusagara