October 19, 2021

Rwandanews24

Publishing Factual, verified and accurate stories

Mu myaka 25 Minisiteri y’Ububanyi n’amahanga imaze kuyoborwa n’Abaminisitiri 8 barimo Sezibera umazeho umwaka 1 na Ndagijimana wamazeho amezi 4

YASUWE 35 

Dr Richard Sezibera wari minisitiri w’ububanyi n’amahanga w’u Rwanda yasimbuwe kuri uyu mwanya nyuma y’umwaka umwe yari awumazeho, hari hashize amezi atatu atagaragara mu mirimo ye.

Sezibera yaherukaga kugaragara mu ruhame mu mirimo ye nka minisitiri muri Nyakanga 2019 ari i Londres mu Bwongereza mu nama yitwa Commonwealth Foreign Affairs Ministers’ Meeting (CFAMM).

Mu gihe hari hashize ukwezi ataboneka, atanakoresha urubuga rwa Twitter nk’uko yari asanzwe akunda kubigenza, havuzwe amakuru menshi ku buzima bwe.

Leta y’u Rwanda ntiyashimye kugira icyo itangaza ku buzima bwa Dr Sezibera, ariko bamwe mu nshuti ze za hafi bakavuga ko ibyo ari ubuzima bwe bwite.

Ku cyumweru taliki 27  Ukwakira 2019, Dr Sezibera yanditse kuri Twitter agaragaza ko ari mu mirimo ye nka Minisitiri.

Yagaragaje ko yasuye ambasade y’u Rwanda muri Israel, kubyo yavuze bamwe bagaragaje ko bishimiye kongera kumubona, abandi bakomeza kugaragaza impungenge bafite ku buzima bwe.

Impinduka zabaye muri guverinoma y’u Rwanda mu ijoro ryakeye zamuvanye ku mwanya we, asimburwa na Vincent Biruta wari minisitiri w’ibidukikije.

Dr Sezibera, wahoze ari umunyamabanga mukuru w’umuryango w’ibihugu bya Afurika y’iburasirazuba (2011 – 2016) nta wundi mwanya yahawe muri izi mpinduka muri guverinoma.

Mu myaka 25 ishize, Dr Sezibera abaye umwe mu baminisitiri 8 b’ububanyi n’amahanga  mu Rwanda, akaba umwe mu bamaze igihe gito mu mirimo.

Abandi bamaze igihe gito muri bo harimo Jean-Marie Vianney Ndagijimana wamazeho amezi ane mu 1994, Amri Sued wamazeho amezi macye mu 1999 na Augustin Iyamuremye wamazeho umwaka umwe.

  • Richard Sezibera: 2018 – 2019
  • Louise Mushikiwabo: 2009 – 2018:
  • Rosemary Museminali 2005 – 2009
  • Charles Murigande: 2002 – 2008
  • André Bumaya: 2000 – 2002
  • Augustin Iyamuremye: 1999 – 2000
  • Anastase Gasana: 1994 – 1999
  • Jean-Marie Vianney Ndagijimana: 07/1994 – 10/1994