October 22, 2021

Rwandanews24

Publishing Factual, verified and accurate stories

RIB yataye muri yombi 12 bageragezaga kwiba amafaranga y’abakiriya muri banki ya Equity hifashishijwe ikoranabuhanga.

YASUWE 26 

Urwego rushinzwe ubugenzacyaha mu Rwanda(RIB) rwatangaje ko rwafashe abantu 12 bageragezaga kwiba amafaranga, bakaba bafashwe bagerageza kwiba amafaranga kuri konti z’abakiliya ba Equity Bank  Rwanda, bakoresheje ikoranabuhanga ibizwi nka (hacking).

RIB yatangaje ko abafashwe ari agatsiko kagizwe n’Abanyakenya umunani (8), Abanyarwanda batatu (3) n’umunya Uganda umwe.

Ngo si ubwambere ibikorwa nk’ibi bibayeho kuko ngo iri tsinda ryari ryarabashije no kwiba muri ubu buryo Equity Bank zo muri Kenya na Uganda nk’uko uru rwego rubivuga.

Aba bafashwa bakaba bamaze gukorerwa dosiye igashyikirizwa ubushinjacyaha bw’u Rwanda kugira ngo bakurikirwanwe.

Si ubwambere mu Rwanda ahavuzwe ubujura nk’ubu kuko mu mwaka ushize  havuzwe ubujura bwifasihshije ikoranabuhanga nk’ubu muri Access Bank.

Mu rubanza rw’abantu 21 barezwe, biganjemo abanyaNigeria n’abanyarwanda, iyi Banki yagaragaje ko hagombaga kwibwa agera kuri miliyari y’amanyarwanda ariko ngo nta na macye yibwe.

Mu rukiko byavuzwe ko mu kwiba abaregwa bari kwifashisha uburyo bwo guhererekanya amafaranga kuri konti n’amakarita yo kubikuza, hakoreshejwe ikoranabuhanga.

Mu 2016 havuzwe ibura ry’amafaranga agera ku $500,000 ikigo cy’uburezi cy’u Rwanda cyari cyohereje muri Nigeria kwishyurira abanyarwanda biga yo, aya akaba yarayoberejwe muri Espagne.

Uru rwego [RIB] rukomeje gushimira abagaragaza ubufatanye bwabo mu gutanga amakuru kugira ngo abanyabyaha nk’aba bafatwe, ariko ikongera kwibutsa abaturarwanda muri rusange guhora bari maso bagatanga amakuru ku gihe atuma ibyaha bikumirwa.