October 16, 2021

Rwandanews24

Publishing Factual, verified and accurate stories

Congo: Indege itwara ibikoresho bya Perezida yaburiwe irengero

YASUWE 64 

Kuri uyu wa kane taliki ya 10 Ukwakira 2019, nibwo  Indege y’igisirikare cya Repubulika Iharanira Demokarasi ya Congo, itwara ibikoresho bya Perezida yaburiwe irengero nyuma y’iminota mike ihagurutse i Goma yerekeza i Kinshasa.

Iyo ndege yo mu bwoko bwa antonov 72 yari itwaye ibikoresho byifashishijwe mu ruzinduko Perezida Felix Tshiesekedi aherutse kugirira mu Burasirazuba bw’igihugu mu ntara za Kivu zombi.

Iyi ndege yatakaje itumanaho n’abagenzura indege ku kibuga cy’indege ubwo yari imaze iminota 59 ihagurutse.  Yari irimo abagenzi 4 n’abashinzwe kuyitwara 4. Yahagurutse i Goma ahagana saa munani n’igice kuri uyu wa kane taliki ya 10 Ukwakira 2019, byari biteganyijwe ko igera i Kinshasa saa kumi n’imwe n’igice z’umugoroba nk’uko Actualités yabyanditse.

Ubuyobozi bw’indege za gisivile muri Congo bwasohoye itangazo buvuga ko iyo ndege ikimara kubura, bashakishije amakuru yose ku minara y’indege iri mu nzira indege yagombaga gucamo, ariko bagakomeza kuyibura.

Batangaje ko bagikomeje gushakisha ngo bamenye irengero ry’iyo ndege.

Perezida Tshisekedi yari amaze iminsi itatu mu Ntara ya Kivu y’Amajyepfo n’iy’Amajyaruguru, akaba yarasoje uruzinduko rwe kuri uyu wa kane. Yageze i Kinshasa ku mugoroba wo kuri uyu wa kane taliki ya 10 Ukwakira 2019.