October 19, 2021

Rwandanews24

Publishing Factual, verified and accurate stories

Perezida Nkurunziza ngo ntaziyamamariza indi manda muri 2020 n’ubwo hari ababimusaba

YASUWE 26 

Umuvugizi w’umukuru w’igihugu avuga ko Perezida Petero Nkurunziza adashobora kwisubiraho ngo yiyamamaze mu matora y’umukuru w’igihugu ategekanijwe mu mwaka utaha wa 2020, n’ubwo hari ababimusaba.

Jean-Claude Karerwa avuga ko abantu baririmba cyangwa basaba ko Perezida Nkurunziza yakongera akiyamamaza,  ari ibitekerezo  byabo ntacyo bishobora guhindura ku cyemezo  yamaze gufata.

Mu 2018, leta y’u Burundi yahinduye itegeko nshinga, aho abatari bake babona ko yari arimo  ategura inzira yo  kongera kwiyamamariza indi manda.

Mu ijambo yagejeje ku baturage  ku munsi wo gutangaza iryo tegeko nshinga rishya, Bwana Nkurunziza ku nshuro ya mbere yatangaje ko atazongera kwiyamamaza.

Hashize iminsi hari abaririmba hirya no hino mu gihugu basaba Perezida Petero Nkurunziza ko yakongera kwiyamamariza indi manda agakomeza kuyobora  u Burundi.

Mu kiganiro yagejeje ku barundi  kuri uyu wa gatatu taliki ya 25 Nzeli 2019, umuvugizi w’umukuru w’igihugu, Jean-Claude Karerwa, yavuze ko ureste abo babiririmba, ko hari n’ababimusaba babicishije mu nzandiko.

Ati: “Ni ibisanzwe ko abantu bakunda umuntu, ariko kandi nagirango mbamenyeshe ko  hari n’abatifuza ko yakomeza kuba perezida w’igihugu.

“Uko bimeze rero ntihagire abazajya  barumva ivbo abantu bavuga, nta wuzababuza kuvuga no gutanga ibitekerezo byabo kuko ni uburenganzira bwabo”.

Nkurunziza ntashobora kwisubiraho?

Bwana Karerwa yabajijwe niba Perezida Nkurunziza adashobora guhinduraicyo cyemezo  mu gihe haba hari abantu benshi bamusaba kongera kwiyamamaza.

Yagize  ati: “Nta na kimwe cyahinduka ku cyemezo umukuru w’igihugu yafashe kugeza ubu turimo turavugana”.

Mu gihe hari abibaza ko ishyaka riri ku butegetsi CNDD-FDD rishobora kubura uwiyamamaza kugira ngo  ryongere rimutangeho umukandida,  Bwana Karerwa avuga ko ibyo bidashoboka.

Ati: “Ntihagire utekereza  cyangwa  ngo arote ko ishyaka CNDD-FDD rishobora kubura abiyamamaza, ndakeka ko  ishyaka rifite abifuza kuyobora igihugu benshi”.

Prezida Pierre Nkurunziza yayoboye igihugu cy’u Burundi kuva mu 2005, mu 2015 yiyamamariza indi manda ya 3, arinabwo imivurungano yatangiye muri iki gihugu, abatavuga rumwe nawe bamaganiye kure icyo cyemezo.

Raporo y’umuryango mpuzamahanga ONU ku iperereza yakoze,  yasohotse yasohotse mu cyumweru gishize  ivuga ko perezida w’u Burundi ubwe yabazwa n’amategeko ibyaha byibasiye inyoko muntu abakoze iperereza babonye mu Burundi.

Ubutegetsi bw’u Burundi bwavuze ko ibivugwa n’iyi raporo nta shingiro bifite kandi atari ukuri.