October 16, 2021

Rwandanews24

Publishing Factual, verified and accurate stories

Afurika y’Epfo yasohoye impapuro zo guta muri yombi Abanyarwanda 2 bakekwaho kwica Col Karegeya

YASUWE 16 

Ubushinjacyaha bwa Afurika y’Epfo bwatangaje ko bwasohoye impapuro zo guta muri yombi abantu babiri bacyekwaho kwica uwahoze akuriye ubutasi bw’u Rwanda Col Patrick Karegeya.

Umurambo wa Col Patrick Karegeya wasanzwe muri hotel Michelangelo y’i Johannesburg mu ijoro ryo kuwa 31 Ukuboza 2013.

Uru rwego rwigenga AfriForum rusabira ubutabera Col Karegeya, ruvuga ko rwamenyeshwe n’ubushinjacyaha bw’iki gihugu ko hasohowe impapuro zo guta muri yombi babiri muri bane bacyekwaho kwica Col Karegeya.

Adv. Gerrie Nel uyobora AfriForum irimo kunganira umuryango wa Patrick Karegeya yabwiye BBC ko abantu babiri ari Ismael Gafaranga na Alex Sugira.

Mu kwezi kwa mbere uyu mwaka wa 2019 nibwo hatangiye gukurikirana mu butabera ikirego ku iyicwa rya Co Patrick Karegeya.

Icyo gihe havuzwe abantu bane bacyekwaho kurugiramo uruhare; Appollo Ismael Gafaranga Kiririsi, Alex Sugira, Nshizirungu Vianney na Samuel Niyoyita.

Muri uko kwezi kwa Mutarama 2019 umucamanza Mashiane Mathopa nibwo yategetse ko iki kirego gihabwa ubushinjacyaha, bikaba byari biteganyijwe ko azashyiraho impapuro zo guta muri yombi abaregwa.

Bivugwa ko ubusabe bwo kohereza muri Afurika y’Epfo abo bacyekwa nibumara gutangwa, ubushinjacyaha bwa Afurika y’Epfo buzahita bwandikira polisi mpuzamahanga, Interpol, ngo itange ikizwi nka “Red Notices” ngo abo bacyekwa batabwe muri yombi.

Adv. Nel avuga ko iyi ari “intsinzi ikomeye”, ariko akavuga ko iki ari “ni ikimenyetso ko ubushinjacyaha bwakoresheje nabi urwego rw’ubucamanza kuko impapuro zo guta muri yombi zatanzwe nta rindi perereza rikozwe”.

“Ibi bigakorwa nyuma y’aho ubushinjacyaha bugaragarije ko budashobora gufata icyemezo cyo kuburanisha bugendeye ku bimenyetso bihari busaba ko hakorwa iperereza ry’ubucamanza”.

Mu kwezi kwa kane uyu mwaka wa 2019, urukiko rwa Randburg Magistrate’s Court i Johannesburg rwari rwongeye koherereza iyi dosiye ubushinjacyaha bwa Afurika y’Epfo ngo bufate icyemezo niba bwakurikirana mu mategeko abacyekwaho kwica Col Karegeya.

Ibihugu ntibyohererezanya abakekwa

Umuryango wa Col Karegeya ushinja leta y’u Rwanda urupfu rwe,  Leta y’u Rwanda ntabwo yigeze yemera uruhare ishinjwa mu kwica Col Karegeya cyangwa ngo iruhakane yeruye.

Mu masengesho ku gihugu muri 2014, Perezida Paul Kagame yabaye nk’ukomoza ku byari bimaze kuba kuri Col Karegeya, yagize ati: “Ntuzagambanira u Rwanda ngo ubikire. Uwo ari we wese, n’ukiriho, bizamugaruka. Uwo ari we wese, ni ikibazo cy’igihe gusa”.

Afurika y’Epfo ivuga ko abaregwa bari mu Rwanda, gusa ibihugu byombi nta masezerano yo guhana abaregwa ibyaha bifitanye kugira ngo urwandiko nk’uru rwo guta muri yombi rushyirwe mu bikorwa.

Kuri iki, Adv. Gerrie Nel yabwiye BBC ati: “Dufite icyizere ko abantu bakurikiza amategeko bazatuma ubutabera bugerwaho”.

Guhungira muri Afurika y’Epfo kwa Col Patrick Karegeya na Gen Kayumba Nyamwasa, ibikorwa bya politiki leta y’u Rwanda yabashinjaga gukorerayo, hamwe no kwicwa kwa Karegeya no kugerageza kwica Kayumba byazambije umubano hagati y’ibi bihugu kuva muri 2014.

Urwego AfriForum ruvuga ko rwo n’umuryango wa Col Karegeya “bazakomeza gukurikiranira hafi” iyi dosiye.