October 19, 2021

Rwandanews24

Publishing Factual, verified and accurate stories

Abanyakenya bafungiye mu Rwanda nabo batanze ikirego

YASUWE 30 

Umunyamategeko wunganira Abanyakenya 3 bafungiye mu Rwanda baregwa ibyaha birimo ubushukanyi, uyu munsi taliki ya 20 Kanama 2019 yumviswe n’urukiko ku kirego arega ubushinjacyaha cyo gufunga abakiliya be binyuranyije n’amategeko.

Charles Kinuthia n’abakozi be 2 barimo umwe w’umugore,  kuva mu mpera z’ukwa gatandatu 2019 bafunze by’agateganyo muri gereza nkuru ya Kigali i Mageregere .

Aba bafunze baregwa gukoresha inama itemewe no kwiha iby’abandi bakoresheje ubushikanyi. Ikibazo cy’aba giherutse kugarukwaho na Perezida Paul Kagame ubwo yahuraga n’urubyiruko mu cyumweru gishize.

Uyu munsi mu rukiko, Me Evode Kayitana wunganira abaregwa yavuze ko imiterere y’ikirego igiha isura yihariye, ariko abona cyarafashwe nk’ikirego gisanzwe.

Yagize ati: “Iyo umuntu yafatiwe mu cyuho, akurikiranwa mu buryo mu gifaransa bita Procédure accélérée (bwihuse), ubugenzacyaha [RIB] bugeza dossier mu bushinjacya mu minsi itatu, ariko RIB yafashe iminsi itanu.

“Ubushinjacyaha bugomba kuregera mu rukiko mu minsi itanu bukimara kubona dossier,  ariko bwatwaye iminsi irenga 30 kugira ngo burege, mu minsi nka 20 [abaregwa] bakagombye kuba baraburanye mu mizi none ubu baracyafunze by’agateganyo”.

Ibyo bivuze ko bakurikiranywe mu buryo butemewe n’amategeko.

Me Kayitana yabajije urukiko impamvu ubushinjacyaha bwafunze abo banyakenya bonyine naho abandi 10 bakurikiranywe ku cyaha kimwe bakaba badafunze.

Kimwe mu byo baregwa harimo amahugurwa ya baringa, Me Kayitana we avuga ko bafite inyemezabwishyu ya $5200 ( miliyoni 4,7Rwf) bari bishyuye Kigali Convention Centre kugira ngo bahakorere amahugurwa.

Avuga ko Charles Kinuthia umunyakenya uri ku isonga mu baregwa atagomba gufatwa nk’umutekamutwe kuko yafatiwe mu cyumba cy’amahugurwa ndetse afite n’imfashanyagisho yari kwiyambaza mu guhugura abo abitabiriye.

Abitabiriye aya mahugurwa barengaga 3,000 ariko bavuga ko baje biteguye gutahana $197 (177,000 Frw) mu gihe bo batanze nibura 4,500Frw yo kwiyandikisha.

Abaregwa bo bavuga ko ntawe bijeje gutahana ayo madorari, ahubwo ayo madorari ngo ari agaciro k’ubumenyi bari guhabwa.

Ubushinjacyaha bwo bwasabye ko icyifuzo cy’abaregwa cyo gufungurwa by’agateganyo giteshwa agaciro kuko ari icyemezo cyafatiwe mu rukiko bagategereza urubanza mu mizi mu ntangiro z’ukwezi gutaha kwa Nzeli.