October 20, 2021

Rwandanews24

Publishing Factual, verified and accurate stories

Paul Pogba ngo yaba asigaje udutsinsino muri Manchester United

YASUWE 16 

Mino Raiola, uhagarariye Paul Pogba ukina hagati muri Manchester United, yabwiye ikinyamakuru The Times cyo mu Bwongereza ko uyu mukinnyi ashaka kuva muri iyi kipe.

Pogba w’imyaka 26 y’amavuko, muri iki cyumweru ntabwo yagaragaye mu myitozo yo kwitegura shampiyona itaha,  ibintu byatumye harushaho kwibazwa ku hazaza he muri iyi kipe.

Muri Kamena 2019, Pogba yavuze ko “ubu gishobora kuba ari cyo gihe cyiza cyo kureba agashya ahandi”.

None n’uyu Raiola umuhagarariye, yabwiye  The Times ati: “Buri wese azi ubushake bwa Paul bwo kugenda. Tubirimo”.

Uyu Mutaliyani uhagarariye Pogba yakomeje agira ati: “Buri wese mu ikipe, kuva ku mutoza kugera kuri nyir’ikipe, azi ibyifuzo bya Paul”.

Abajijwe niba Pogba ejo ku cyumweru taliki ya 7 Nyakanga 2019 azajyana na Manchester United mu mikino yo kwitegura shampiyona izabera muri Australia, Raiola yarasubije ati: “Ntacyo nshobora kubibabwiraho”.

Pogba ashobora kuva muri United

United iteganya ko Pogba azaba ari kumwe na bagenzi be ejo ku cyumweru mu ndege yerekeza muri Australia.

Ni mu gihe ku wa mbere w’iki cyumweru benshi mu bo bakinana bo bitabiriye imyitozo, Pogba we ntiyari ahari  ku ruhushya yahawe n’umutoza Ole Gunnar Solskjaer ngo aruhuke nyuma y’amezi 16 ashize yagizemo akazi kenshi.

Hashize amezi hari amakuru y’uko Pogba ashobora kuva muri United.

Muri Werurwe 2019, Pogba yavuze ko Real Madrid ari “ikipe y’inzozi ku mukinnyi uwo ari we wese”, n’ubwo icyo gihe yongeyeho ko yishimiye kuba muri United.