October 22, 2021

Rwandanews24

Publishing Factual, verified and accurate stories

Ese koko abahinzi ba kawa babuzwa kuyinywa n’ubunebwe bwo kuyitunganyiriza?

YASUWE 28 

Kuba uri umuhinzi nturye ku musaruro w’ibyo wejeje ahubwo byose ukabimarira ku isoko, kimwe n’ikindi gikorwa wakora ntufate ku nyungu ngo wumve ko wakigezeho wavunitse ubundi ngo wisane, nibyo byakagombye kuranga uwakoze akagera ku musaruro.

Ibi siko bimeze ku bahinzi ba kawa kuko ngo bo bazigemura batisigiye izo kunywa kandi ngo kunywa kawa itanyujijwe mu ruganda aribwo iryoha kurushaho.

Mu kiganiro twagiranye na Axel Ngarambe, umwe mu bashinzwe gusuzuma ubuziranenge bwa kawa, yabwiye rwandanews24 ko kuba abahinzi ba kawa batayinywa bayitunganyirije babiterwa n’ubunebwe.

Yagize ati: “abahinzi ba kawa ntibayinywa kandi bakagombye kuyinywa kuko umuntu ashobora kuyitunganyiriza bitagombeye kunyura mu ruganda, ariko kubera ubunebwe bakavuga ko bigoranye”.

Yakomeje atubwira ko umuntu afata kawa yumye neza, ukayikaranga ku rujyo cyangwa mu nkono ya Kinyarwanda kuko ngo ibumba ribikoze riyifasha gushyuha, kutayibabura ndetse no kutayishiririza.

Nyuma yo gukaranga ikawa yawe, urayifata ukayisekura mu isekuru ya Kinyarwanda n’umuhini ukayinoza neza. Iyo imaze kunoga urayiyungurura ubundi ugashyira ya fu mu gikoresho gifite isuku kugirango ubone uko uza kuyikora wifashishije amazi yabize nk’uko bisanzwe umuntu ateka amazi yo gukoresha icyayi gisanzwe.

Kawa isekurwa nyuma yo kuyikaranga kugirango inyobwe

Kuri kawa ho rero ushyiramo amazi ukurikije abaribuyinywe, bitandukanye n’uko wakora icyayi gisanzwe.

Ngarambe yatubwiye ko iyo abahinzi ubabwiye ubu buryo bwo kwitunganyiriza kawa bakubwira ko bigoye batabivamo.

Umwe mu bahinzi ba kawa Kabanda Marcel, tumubajije impamvu agemura kawa zose ntasigire umuryango iyo kunywa kandi bishoboka ko bayitunganyiriza murugo, yatubwiye ko icyo bahinga bagambiriye atari ukuyinywa, ahubwo ari ugushaka amafaranga kandi ngo akazi ko kuyitunganya nako ntikoroshye kuko gasaba umwanya kandi ngo bakaba bagira mucye igihe cy’umwero.

N’ubwo abahinzi ba kawa bavuga ko kwitunganyiriza kawa ngo bayinywe batabivamo, niyamaze gutunganywa inyujijwe mu ruganda nayo ntibayinywa.