October 22, 2021

Rwandanews24

Publishing Factual, verified and accurate stories

CAN 2019: Umurundi Selemani Ndikumana yirukanwe adakojeje ikirenge ku mupira

YASUWE 20 

Selemani Ndikumana, yigeze kuba kizigenza w’Intamba mu Rugamba, akaba ari n’umwe mu bakinyi bakuze kurusha abandi muri iyo kipe, akaba ari umwe muri  23 baserukiye u Burundi mu gikombe cya Afrika 2019 mu Misiri.

Selemani yahise yurizwa indege imusubiza i Bujumbura, akaba agiye adateye umupira na rimwe ku nshuro ya mbere yari yitabiriye igikombe cya Afrika.

Iyirukanwa rye ryavuzweho byinshi, bamwe bakavuga ko ryavuye ku kutumvikana kuri mu ikipe yose, abandi bakavuga ko ikipe imaze gucikamo ibice ibiri, uwushyigikiye Selemani n’uwutamushigikiye.

None ikibazo cyifashe gute?

Mu gushaka  kumenya uko byifashe, BBC yaganiriye n’ ushinzwe gutanga amakuru mu ikipe Intamba mu Rugamba, Kibuga Ramadhani, aho ari kumwe n’Intamba mu mujyi wa Alexandria, atubwira ko ibyo bivugwa byose ntakuri kubirimo.

Ku kibazo cy’uko umwuka waba utari mwiza mu ikipe, Bwana Ramadhani yagize ati: ”Oya. Umwuka (ambiance) imeze neza cyane. Cyari ikibazo cy’umutoza [Olivier Niyungeko] na Selemani, si ikibazo cy’ikipe n’ umutoza.

”Kandi abo twakwita aba cadres ba ekipe bari bagerageje kumuhanura [Selemani] ntibyakunda. Rero morale ni yose mu bakinnyi.”

Intamba mu Rugamba kuri uyu wa gatandatu taliki ya 22 kamena 2019, zirahura n’ikipe ya Nigeria iri mu zihabwa amahirwe muri iri rushanwa, bikaba rero bitaba ari byiza mu gihe Intamba zaba zifite akabazo.

Kugarura  Selemani ntibishoboka

Umurundi Selemani Ndikumana yirukanwe muri CAN 2019 adakinnye umukino n’umwe

Ikipe yose mu irushanwa igenda ijyanye abakinyi 23, bisobanuye ko ubu Intamba zisigaranye abakinyi 22, hakibazwa niba bishoboka ko Selemani yagaruka.

Kuri icyo, ushinzwe gutanga amakuru muri iyo kipe yabwiye BBC ati: ”Ntibishoboka kumugarura. Kuko umukinyi agarurwa iyo afite ibibazo by’uburwayi,  nabwo bikemezwa na CAF.

”Selemani yagize ikibazo cya discipline. Kandi umwanya wo kugarurwa warangiye. [Uwo mwanya ni amasaha 24], imbere y’umukino wawe wa mbere.”

Bwana Ramadhani yatangaje ko gukurwa kwa Selemani mu ikipe ntangaruka bishobora kugira, ngo kuko n’ubundi ntiyari muri 11 bari kubanza mu kibuga. Ngo umukino wa nyuma yakiniye Intamba wari i Juba mu kwezi kwa 11 mu 2018, akaba atari mu bakinyi nyamukuru.

Umubano mu Ntamba mu Rugamba ngo ni mwiza

Bamwe mu bayobozi bajyanye n’iyi kipe y’u Burundi, muri rusange bemeza ko abakinyi bafatanye mu mugongo, ushinzwe gutanga amakuru, Bwana Ramadhani, akaba yavuze ko biboneka no ku jisho.

Yagize ati: ”Imibanire ni myiza. Nta kibazo, ikipe iri hamwe. Biraboneka neza mu myitozo, ni nk’uko bisanzwe ibihe byose, ntakidasanzwe.”

Uyu munsi taliki ya 22/06/2019, ikipe y’u Burundi Intamba mu Rugamba iraza kwandika amateka mu mupira w’amaguru muri icyo gihugu, aho iza gukina ku nshuro ya mbere mu irushanwa  ry’igikombe cya Afrika, ikaba ihura na Nigeria.

Ni umukino utangira saa moya z’umugoroba ku masaha yo mu Misiri, urukaza kubera ku kibuga cya Alexandria Stadium mu mujyi wa Alexandira. U Burundi buri mu itsinda B aho buri kumwe n’amakipe ya Nigeria, Madagascar na Guinea.

Undi mukino wo mu itsinda B uraza guhuza Madagascar na Guinea, ube saa yine z’ijoro ku kibuga cya Alexandria Stadium.

.