October 24, 2021

Rwandanews24

Publishing Factual, verified and accurate stories

Burundi: Barimo kwamagana RFI ngo yivanze mu buzima bwabo

YASUWE 22 

Mu Burundi kuri uyu wa gatandatu taliki ya 8 Kamena 2019, abarundi babyukiye mu myigaragambyo yamagana radio mpuzamahanga y’Abafaransa (RFI), ubutegetsi bushinja kutubahiriza ihame ryo kutabogama rigenga umwuga w’itangazamakuru mu kiganiro iherutse kugirana na Marguerite Barankitse.

Ubutumwa buhamagarira Abarundi bose kwitabira iyi myigaragambyo bwahererekanyijwe ku mbuga nkoranyambaga guhera mu ijoro ryo ku wa kane  taliki ya 6 Kamena 2019.

Mu cyumweru gishize, RFI yagiranye ikiganiro na Madamu Barankitse utavuga rumwe n’ubutegetsi kuri ubu uba mu buhungiro, wanenze ubutegetsi bw’u Burundi, umukuru w’igihugu na politiki y’iki gihugu.

Barasaba RFI na TV5 gusaba uburundi imbabazi

Videwo yagaragaye mu ntangiriro z’iki cyumweru, yerekana umuyobozi wa komisiyo ya leta ishinzwe kugenzura imikorere y’ibitangazamakuru (CNC), avuga ko bagiye kureba icyo amategeko ateganya, hanyuma hafatwe “ingingo ibereye” izatangazwa nyuma.

Nestor Bankumukunzi ashinja RFI kubogama mu kunanirwa kubaza ibibazo bihinyuza bisaba Madamu Barankitse gutanga ibimenyetso by’ibyo yavugaga muri icyo kiganiro.

Ntacyo RFI yari yatangaza ku mugaragaro ku myigaragambyo y’uyu munsi.

Abarundi bitabiriye imyigaragambyo ku bwinshi

Itangazo rihamagarira Abarundi kwitabira iyo myigaragambyo ryavugaga ko izabera ku mirwa mikuru y’intara, ko “n’iyonka nta muntu n’umwe ukwiye gusiba” kandi buri komini izahagarara ukwayo.

Uyu munsi abaturage babyukiye mu mihanda bafite ibyapa byamagana ibitangazamakuru birimo RFI, TV5 Monde n’ibindi, babishinja “kwivanga mu buzima bw’u Burundi” no “guha ijambo Marguerite Barankitse”.

Bitabiriye imyigaragambyo bafite ibyapa

Nta mutegetsi mu Burundi wigaragaje ahamagarira iyi myigaragambyo.

Imwe mu miryango yigenga ibogamiye kuri leta nka ACOPA, yasohoye amatangazo yamagana RFI n’ibindi bitangazamkauru byahaye umwanya Madamu Barankitse utavuga rumwe n’ubutegetsi mu Burundi.

Muri Werurwe  uyu mwaka wa 2019, ubutegetsi bw’u Burundi bwahagaritse burundu igitangazamakuru BBC gukorera mu Burundi ndetse na Radio Ijwi ry’Amerika.

Ku wa kane w’iki cyumweru, akanama gashinzwe gukurikirana uburenganzira bwa muntu ku rwego mpuzamahanga mu nteko ishinga amategeko ya Canada kahaye Madamu Barankitse igihembo nk’impirimbanyi y’uburenganzira bwa muntu.