October 26, 2021

Rwandanews24

Publishing Factual, verified and accurate stories

Sudani: Bahakanye urupfu rw’abantu 100 bafunga Ibitaro

YASUWE 18 

Ishyirahamwe ry’abaganga ryegamiye abatavuga rumwe n’ubutegetsi, ejo taliki ya 5 Kamena 2019 ryatangaje ko abantu bashyika 100 aribo bamaze kwicwa mu murwa mukuru Khartoum, mu gihe cy’imyigaragambo igamije ubutegetsi buri mu maboko y’Abasivire, bakaba bamaze ngo gufunga ibitaro ngo abakomerekera muri izi mvururu bativuza.

Komite nyobozi y’iryo shyirahamwe ry’abaganga yatangaje ko imirambo 40 ariyo yatowe mu ruzi rwa Nil i Khartoum kuwa kabiri w’ iki cyumweru taliki ya 4 Kamena 2019.

Amakuru dukesha Channel 4  aravuga ko umwe mu bayoboye iryo shyirahamwe  yavuze ko biboneye kandi bakigaragurira imirambo mu mavuriro, akavuga ko imibare y’abahasize ubuzima  igera ku bantu 100. Yagize ati: “Bwari ubwicanyi bw’agahomamunwa”

Uwahoze mu ngabo zishinzwe umutekano, Yousra Elbagir, yabwiye ikinyamakuru Channel 4 cyo mu Bwongereza ko bamwe mu batawe mu ruzi rwa Nil bari bakubiswe cyangwa barashwe, abandi nabo batemaguwe n’imipanga.

Mu ntangiriro abategetsi ntacyo bari bashatse gutangazakuri ubu bwicanyi, ariko umutegetsi wo mu ishyirahamwe riharanira uburenganzira bwa muntu yemeje mugitondo cy’uyu  munsi ko abantu 46 ari bo bishwe.

Igice kinini cy’umurwa mukuru Khartoum kigoswe n’abashinzwe umutekano nyuma y’ubwo bwicanyi.

Abaturage bahunze Umujyi

Ababibonye bavuga ko abari mu myigaragambyo bahungiye mu ma karitsiye, aho barimo bafungira imihanda hakanatwikirwa amapine mu rwego rwo guhosha abigaragambya.

Umwe mu baba aho i Khartoum utashatse ko izina rye rimenyekana, yagize ati: “Tugeze aho tudashobora no kuva mu nzu kubera ko dutinya gukubitwa cyangwa tukaraswa n’abashinzwe umutekano”. Abanyagihugu bo mu murwa mukuru baravuga ko bishwe n’ubwoba.

 

Umudamu utuye i Khartoum Sulaima yatangarije  BBC ko ” Bazengurutse amakaritsiye, batera ubwoba abanyagihugu, kandi barasa. Nta mutekano twumva dufite kandi ntitwizeye inzego zishinzwe umutekano. Ibintu byasubiye rudubi”.

Ejo ku wa gatatu, icyegera cy’umukuru w’inama ya gisirikare iyoboye igihugu, Mohammed Hamadan uzwi ku ‘izina rya Hemedti, yavuze ko byabaye ngombwa ko bakoresha ingufu.

Avuga ko abari mu myigaragambyo binjiranywe n’inkozi z’ibibi n’abandi bagurisha ibiyobyabwenge.

Yagize  ati: “Ntidushobora kwihanganira abo tutavugarumwe. Nta kundi. tugomba kubahiriza amategeko mu gihugu”.

Inama ya gisirikare “yiteguye gusubira kuganira nta nzitizi”

Umwe mu bavuzi wavuganye na BBC ari i Khartoum, avuga ko abagize umutwe witwara gisirikare wegamiye inzego z’umutekano,  bategetse ko amavuriro afungwa kugira ngo ntihagire abasivire bajya kwivurizayo.

Yagize ati: “Batwirukanye mu bitaro aho twarimo kuvura abakomeretse. Ni itegeko ryatanzwe n’inama ya gisirikare ko amavuriro afungwa kubera ko turimo gufasha abanyagihugu barimo gukomerekera muri izi mvururu”.

Abari mu myigaragambo bamaze igihe bakikije ibiro bikuru bya gisirikare mu gihe hari hashize iminsi hari ibiganiro hagati y’inama ya gisirikare n’abayoboye iyo myigaragambyo.

Impande zombi zari zimaze kumvikana nzibacyuho  yamara imyaka itatu, ariko ku munsi wa mbere, Abdel Fattah al-Burhan yahagaritse ayo masezerano bari bamaze kugirana, atangaza ko hagiye gutegurwa amatora mu mezi9.

Ariko ku munsi wa gatatu, Jenerali Burhan yatangaje ko inama ya gisirikare yari “yiteguye gusubira kuganira nta nzitizi”.

Abatavuga rumwe n’ubutegetsi bamaganiye kure iyi mvugo, bavuga ko badashobora kwicarana n’abo bita abicanyi.

Amjad Farid umuvugizi w”ishyirahamwe ry’abakozi agira ati: “Abanyagihugu ba Sudani ntibashobora kuganira n’iyo nama ya gisirikare yica abanyagihugu”.

Dukeneye ko abakora ubwicanyi bamenyekana bagashyirwa imbere y’ubucamanaza mbere y’ibiganiro ibyo ari byo byose bya politike”.

Kugera magingo aya, igihugu cya Sudani kiyobowe n’inama ya gisirikare kuva uwahoze akiyoboye, Omar al-Bashir ahiritswe ku butegetsi n’igisirikare, akaba yari amaze imyaka 30,inyuma y’imyigaragambyo yari imaze igihe imwamagana.