October 16, 2021

Rwandanews24

Publishing Factual, verified and accurate stories

Urubanza rwa Col Tom Byabagamba na bagenzi be ruzakomeza nyuma y’ igenzura ry’uko bafunze-Abacamanza

YASUWE 60 

Ibi ni ibyatangajwe n’ Abacamanza kuri uyu wa gatanu taliki ya 31 Gicurasi 2019, ubwo Urukiko rw’ubujurire rwavuagaga  ko rugiye gusuzuma uko Col Tom Byabagamba na bagenzi be bafunzwe, nyuma y’ uko barubwiye ko bafunze nabi kandi binyuranye n’amategeko.

Mu cyumweru gishize, uru rukiko rwatangiye kuburanisha ubujurire bwa Col Tom Byabagamba wahoze akuriye abarinda Perezida Paul Kagame na ‘Jenerali’ uri mu zabukuru Frank Rusagara n’umushoferi we Sergeant François Kabayiza.

Mu mwaka wa  2016 nibwo aba bakatiwe gufungwa bahamijwe ibyaha birimo guteza imvururu muri rubanda, kwamamaza nkana ibihuha bangisha abaturage ubutegetsi buriho n’icyaha cyo gusuzugura ibendera ry’igihugu ibyaha abaregwa bahakanye.

Col. Byabagamba na Rusagara Frank uyu munsi mu Rukiko

Ubushize mu rukiko ubushinjacyaha bwavuze ko ubujurire bwabo budakwiye kwakirwa kuko hari ibyo butujuje, ariko bo bavuze ko bafunze nabi kandi mu buryo bunyuranyije n’amategeko.

Mu iburanisha ry’uyu munsi taliki ya 31 Gicurasi 2019, uru rukiko rwanzuye ko ubusabe bw’ubushinjacyaha nta shingiro bufite. Abacamanza bavuze ko urukiko rugiye kugenzura ibyavuzwe n’abaregwa ko bafunze nabi.

Col Byabagamba ufungiye kuri gereza ya gisirikare ya Mulindi, yavuze ko amaze imyaka itanu afungiye mu kato n’itatu adasurwa, naho Frank Rusagara yinubiye ko afungiye mu kigo cya gisirikare cya Kanombe kandi urukiko rwarategetse ko afungirwa muri gereza ya gisirikare ya Mulindi.

Abacamanza bavuze ko urubanza ruzakomeza kuwa gatandatu taliki ya 13 Kamena 2019, urukiko rukazagaragaza uko rwasanze abaregwa bafunze n’iburanisha rigakomeza.